Guterres: Miliarda njerëz po përballen me epidemi të nxehtësisë ekstreme

Foto: Wikipedia

Njerëzimi është duke vuajtur prej “epidemisë së nxehtësisë ekstreme”, ka thënë të enjten shefi i Kombeve të Bashkuara, Antonio Guterres, i cili ka bërë thirrje për të vepruar, në mënyrë që zvogëlohet ndikimi i valëve të të nxehtit, të cilat janë rezultat i ndryshimeve klimatike.

“Miliarda njerëz janë duke u përballur me epidemi të nxehtësisë ekstreme – duke përfshirë valë të të nxehtit, temperatura gati 50 gradë Celsius”, ka thënë ai.

Sipas agjencisë evropiane, Copernicus, 21, 22 dhe 23 korriku kanë qenë tri ditët më të nxehta ndonjëherë në histori, derisa 22 korriku ka shënuar rekordin e të gjitha kohërave, me 17.16 të temperaturës mesatare të ajrit, shkruan REL, përcjell Albinfo.ch.

Guterres e ka përsëritur thirrjen e tij që njerëzimit të luftojë “varësinë” ndaj lëndëve djegëse të papërpunuara.

“Sot, fokusi ynë është në ndikimin e nxehtësisë ekstreme. Mirëpo, le të mos harrojmë se kemi edhe simptoma tjera shkatërruese prej krizës klimatike: uragane të ashpra, vërshime, thatësi, zjarre pyjore, rritje të nivelit të ujërave. Dhe lista vazhdon”, ka thënë ai.

“Për t’i mposhtur të gjitha këto simptoma, ne duhet ta luftojmë sëmundjen. Dhe sëmundja është djegia e shtëpisë sonë të vetme. Sëmundja është varësia ndaj lëndëve djegëse të papërpunuara. Sëmundja është mosveprimi klimatik”, ka thënë ai, duke kërkuar sidomos veprim të 20 vendeve më të industrializuara në botë (G20).

Ndonëse viti 2023 është konsideruar më i nxehti ndonjëherë, viti 2024 mund të thyejë rekord të ri, pasi temperaturat mbi 40 gradë po bëhen të zakonshme.

Brenda një viti, temperatura 50 gradë Celsius është regjistruar në të paktën 10 vende, në Luginën e Vdekjes në Shtetet e Bashkuara, në Agadir të Marokos dhe në disa vende në Indi dhe Kinë.

Nxehtësia ekstreme, e quajtur edhe si “vrasësja e heshtur” besojet se ka qenë përgjegjëse për 489.000 vdekje brenda vitit, në periudhën 2000-2019./Albinfo.ch/