Guvernatori i BQK-së takohet me ambasadorin francez, diskutohet për rregulloren e re

Banka Qendrore e Kosovës përmes një komunikate ka njoftuar se guvernatori Ahmet Ismaili ka takuar ambasadorin e Francës, Olivier Guérot, të cilin e ka informuar mbi Rregulloren për Operacione me Para të Gatshme, duke sqaruar aspektet kryesore, efektet dhe argumentet për pozicionin e saj.

“U sqarua se Rregullorja avancon integritetin e sistemit financiar dhe përafron Republikën e Kosovës me standardet e BE-së”, thuhet në njoftim, transmeton albinfo.ch.

Sipas njoftimit, ambasadori francez u njoftua për planin e BQK-së për zbatimin e kësaj Rregulloreje në praktikë, si dhe veprimet për lehtësimin e efekteve të saj, krahas angazhimit të BQK-së për lehtësimin e transferimit të mjeteve sipas modelit të propozuar dhe gatishmërisë për të diskutuar opsionet e mundshme ligjore.

“Sa u përket shqetësimeve të ngritura lidhur me ndikimet e saj në një komunitet të caktuar, u sqarua se Rregullorja në fjalë nuk ndalon apo nuk kufizon pranimin e mjeteve në llogaritë bankare në Euro dhe as nuk kufizon aktivitetin këmbimor që kryhen nga institucionet financiare bankare ose jobankare të licencuara nga BQK”, thuhet tutje në komunikatë.

Komunikata bën të ditur se BQK-ja në mënyrë aktive po vazhdon me aktivitete të informimit dhe sensibilizimit, përfshirë lëshimin e linjës pa pagesë të dedikuar për qytetarët dhe materiale të tjera informuese, duke ftuar ata që ende nuk kanë llogari të hapin një të tillë te secila bankë – e cila për grupe të cenueshme nuk ka tarifë të hapjes e as të mirëmbajtjes nga 1 janari 2024 me Rregulloren e BQK-së për Qasje në Llogari Pagese për Shërbime Bazike.