Haradinaj, Brahimaj dhe Balaj shpallen të pafajshëm

Gjykata e Hagës nuk ka gjetur asnjë provë me të cilën vërtetohej akuza e Prokurorisë, se ish guerilët e UÇK-së kishin bërë krime të luftës

Gjykata Penala e Hagës për krimet në ish-Jugosllavi ka shpallur të pafajshëm tre ish luftëtarët e ish- Ushtrisë Çlirimtare të Kosovës, Ramush Haradinaj, Lahi Brahimaj dhe Idriz Balaj. Gjykata nuk ka gjetur asnjë provë me të cilën vërtetohej akuza e Prokurorisë, se ish-guerilët e UÇK-së ishin të përfshirë në krime të luftës.

Vendimi i rigjykimit të pjesshëm u lexua nga gjykatësi i rastit, Bakone Justice Moloto. Ky i fundit tha se Haradinaj, Brahimaj dhe Balaj nuk janë gjetur fajtor për akuzat për: vrasje, torturë dhe trajtim mizor, gjatë luftës së fundit në Zonën Operative të Dukagjinit në UÇK.

Ndërkaq me t’u shpallur vendimi për rastin e Haradinaj, mijëra qytetarë të mbledhur në Sheshin “Nënë Tereza” në Prishtinë, por edhe nëpër qytetet e tjera që ishin duke e përcjellë drejtpërdrejt, kanë nisur festën. Fishekzjarrët dhe të shtënat kanë vazhduar për disa minuta. Për shumë qytetarë kjo është vazhdimësi e festës së 100 vjetorit.

Ramush Haradinaj, ish- komandant i UÇK-së në Dukagjin, është duke u përballur me Tribunalin e Hagës që nga 9 marsi i vitit 2005. Ai ishte akuzuar se bashkë me dy bashkëluftëtarët e tij kishte bërë krime të luftës ndaj serbëve, romëve, ashkalive dhe egjptasve, por edhe ndaj shqiptarëve kolaboracionistë të pushtetit të Serbisë gjatë viti 1998-1999.

Mirëpo më 3 prill të vitit 2008 Dhoma Gjyqësore e Tribunalit kishte shpallur aktgjykimin sipas të cilit, Haradinaj dhe Balaj ishin shpallur të pafajshëm lidhur me të gjitha akuzat për krime lufte, ndërsa Lahi Brahimaj ishte dënuar me gjashtë vjet burgim për trajtim mizor dhe torturim të dy personave në shtabin e UÇK-së në Jabllanicë.

Prokuroria e Hagës ndërkaq kishte paraqitur ankesë lidhur me vendimin e parë dhe si rezultat i kësaj, më 21 korrik të 2011, Dhoma e Apelit e Tribunalit e kishte vendosur për rigjykim për tre ish-pjesëtarët e UÇK-së. Ata sot u shpallën të pafajshëm dhe pas procedurave të Tribunalit, pritet të kthehen sot ose nesër në Kosovë.