Haradinaj: Dështimi për anëtarësim në KiE duhet t’i faturohet Kurtit

Ramush Haradinaj, Facebook

Kryetari i Aleancës për Ardhmërinë e Kosovës, Ramush Haradinaj, thotë se dështimi i Kosovës për anëtarësim në Këshill të Evropës të premten e 17 majit duhet t’i faturohet kryeministrit Albin Kurti.

“Mospërfshirja e Kosovës për votim në Këshillin e Ministrave është dështimi më i madh i Kosovës në arenën ndërkombëtare. Ky dështim i faturohet një njeriu, e ai është Albin Kurti. Eksperimentet e tij jo vetëm që e kanë dëmtuar rëndë imazhin e vendit, por po e dobësojnë edhe subjektivitetin e shtetit”, ka shkruar ai në Facebook.

Haradinaj u ka bërë thirrje shteteve të Bashkimit Evropian që “të mos i ndëshkojnë qytetarët dhe shtetin e Kosovës, për shkak të papërgjegjësisë dhe mungesës së seriozitetit të një njeriu”.