Haradinaj: Eksodi në Bllacë nuk do të harrohet kurrë

FB: Ramush Haradinaj

Kreu i Aleancës për Ardhmërinë e Kosovës, Ramush Haradinaj vendosi lule pranë Memorialit përkujtimor “Bllaca 99”. Prej aty, ai u shpreh se eksodi i ndodhur 24 vjet më parë nuk do të harrohet kurrë. “Jemi këtu për t’i përkujtuar shqiptarët e Kosovës, të civilëve të zhvendosur me dhunë nga shtëpitë e tyre dhe pa pas mundësi me marrë asgjë me vete por vetëm me shpëtu jetën. Kjo zhvendosje nuk ka qenë aq e thjeshtë, këtu janë mbajt me javë të tëra pra burra, gra e fëmijë e pleq dhe siç e dimë numri i tyre është mbi një milion e gjysmë”, tha ai përcjellë albinfo.ch.

Llogaritet se rreth 440 mijë refugjatë shqiptarë të dëbuar nga forcat serbe, pas nisjes së bombardimeve të NATO-s, kanë kaluar nëpër Kampin e Bllacës. “Liria e Kosovës ka në themelet e veta edhe ata që dhunshëm u dëbuan nga shtëpitë e tyre. Ata u bënë imazhi i Kosovës që kërkonte të drejtën e vet”, u shpreh Haradinaj, përcjellë albinfo.ch.

Më 1999 qindra mijëra shqiptarë u dëbuan dhunshëm nga shtëpitë e tyre për t’u vendosur në kampin e refugjatëve në Bllacë të Maqedonisë së Veriut.