Haxhiu: Nuk u dëmtuan mbetjet mortore, arkivi e as mostrat nga zjarri

Ministrja e Drejtësisë në Kosovë, Albulena Haxhiu, ka njoftuar se nga vlerësimet fillestare për zjarrin në Institutin e Mjekësisë Ligjore, nuk ka dëmtim të mbetjeve mortore, arkivit dhe mostrave.

“Rreth orës 08:00 të mëngjesit, nga drejtori i Institutit të Mjekësisë Ligjore, Ditor Haliti, jam njoftuar që dy zyra në katin e dytë në objektin e IML, janë përfshirë nga zjarri. Ekipet e zjarrëfikësve, policia, prokuroria menjëherë kanë shkuar në vendin e ngjarjes. Nga vlerësimet fillestare, nuk ka pasur djegie ose dëmtim të mbetjeve mortore, arkivës së IML dhe mostrave”, ka shkruar ministrja në Facebook, përcjell albinfo.ch.

Ajo shton se po kryhen punët për të zbuluar shkaktarët e zjarrit.

“Për shkak të atyre që kanë ndodhur në IML ndërvite, me të drejtë qytetarët mund të jenë të shqetësuar lidhur me këtë mirëpo pa kuptuar shkakun e zjarrit nuk mund të japim informacione më shumë. Sapo të kemi informacione më të detajuara lidhur me rastin, do të njoftojmë me kohë”, ka përfunduar ajo.

Të martën në mëngjes, dy zyra në objektin e IML-së u përfshinë nga flakët. Zjarrfikësit kanë lokalizuar shpejt zjarrin, përcjell albinfo.ch.