Hidhet poshtë çdo e shtata kërkesë për natyralizim të lehtësuar

Nëse shqyrtohet numri i natyralizimeve të rregullta dhe atyre të lehtësuara, vitin e kaluar më së shumti natyralizime ka bërë Kantoni i Cyrihut, 8046 sish

Vitin e kaluar në Zvicër janë natyralizuar me procedurë të lehtësuar 10688 persona, përfshirë këtu edhe njerëz me banim jashtë Zvicrës. Por siç bën të ditur Sekretariati Shtetëror për Migracion (SEM) janë refuzuar vetëm 27 kërkesa ndërsa 1703 dosje me këtë temë janë pezulluar, shkruan 20minuten.ch. “Pezullimi” shpjegohet me atë se, në rastet kur SEM ka konstatuar shkallë të ulët integrimi te personi që ka bërë kërkesë, i ka rekomanduar atij që ta tërheqë atë.

Marrë në tërësi i bie se kuota e kërkesave të pasuksesshme ka qenë rreth 14 për qind. Kuota të ngjashme janë shënuar edhe në vitet paraprake.

Që nga viti 2000, numri i të huajve që fitojnë pasaportën zvicerane është rregullisht rreth 10 mijë.

Nëse shqyrtohet numri i natyralizimeve të rregullta dhe atyre të lehtësuara, vitin e kaluar më së shumti natyralizime ka bërë Kantoni i Cyrihut, 8046 sish, transmetopn albinfo.ch. Por ky kanton ka numër dukshëm më të madh të banorëve se shumica e kantoneve tjera, kështu që ky numër është në përpjesëtim më i ulët se në kantonet frankofone si ai i Vaudit (7443) ose i Gjenevës (6356). Kështu, kantonet në fjalë kanë numrin proporcionalisht më të madh të të natyralizuarve.

Edhe kur është fjala për natyralizimin e lehtësuar, Cyrihu është në vend të parë, me 20131 veta. Pas tij vijnë kantoni i Vaudit me 1129 dhe ai i Bernës me 1099 të natyralizuar me procedurë të lehtësuar.

Nga ana tjetër, në fund të listës është kantoni Uri, ku, gjatë vitit 2016 janë natyralizuar vetëm 34 veta, përcjell albinfo.ch. Por specifike për këtë kanton është se në shumicën e madhe (29) bëhet fjalë për natyralizime të lehtësuara. Në vendin e dytë (nga fundi) është kantoni Appenzell Innerhoden me 38 natyralizime dhe në të tretin Kantoni Glarus me 41 sish.