Hiqet ndalesa e qarkullimit për azilkërkuesit

Deri më tash, azilkërkuesit në Baden-Württemberg, për të lëvizur jashtë qarkut ku janë strehuar, duhej të merrnin leje të posaçme

Azilkërkuesit me qëndrim në Republikën Baden-Württemberg së shpejti do të kenë të drejtë lëvizjeje të lirë brenda territorit të republikës. Këtë e ka deklaruar ministri i brendshëm Reinhold Gall nga SPD.

Deri më tash, prej më shumë se 30 vitesh, azilkërkuesit, për të lëvizur jashtë qarkut ku janë strehuar, duhej të merrnin leje të posaçme. Ndryshe, nëse kapeshin më shumë se një herë duke udhëtuar jashtë qarkut, ata ndiqeshin penalisht. Në këtë mënyrë, me dosje penale, ata rrezikonin edhe procedurën e tyre të azilit.

Kjo ka sjellë edhe te një perceptim i gabuar në statistikat për “kriminalitetin” e azilkërkuesve, ka pranuar ministri Gall. Gjatë vitit të kaluar, autoritetet kishin regjistruar 627 shkelje të përsëritura “detyrimit rezident”, siç mban emrin zyrtar ky detyrim, shkruan Migazin.

Këtë hap të qeverisë së republikës, e kanë përshëndetur përfaqësuesit e kishave dhe të organizatave që mbrojnë të drejtat e azilkërkuesve. “Një zgjidhje shumë humane, edhe pse e vonuar. Kjo përkon me kërkesat e bëra tash sa kohe nga kisha dhe organizatat tona”, kanë thënë ata.