Historia e familjes Dehari: Nga Zvicra në Kosovë

Në këtë dokumentar flasin Avni Dehari dhe dy djemtë e tij, tashmë të ndjerë, Arbënor Dehari dhe Astrit Dehari

Të shtunën në rrethana ende të paqarta ka ndërruar jetë, Astrit Dehari, anëtar i Lëvizjes Vetëvendosje.

Por, dy vjet më parë, edhe vëllai i tij, Arbënor Dehari, kishte vdekur në rrethana mjaft të dyshimta. Ai kishte rënë nga kati i gjashtë i banesës. Edhe Arbënori ishte anëtar i Lëvizjes Vetëvendosje dhe sekretar teknik, shkruan albinfo.ch.

Në një film dokumentar (të transmetuar nga kosovapress) të punuar me rastin e dyvjetorit të pavarësisë së Kosovës, më 17 shkurt 2010, tregohen se si nga Zvicra kishin ardhur për të jetuar në Kosovë.

Në këtë dokumentar flasin Avni Dehari dhe dy djemtë e tij, tashmë të ndjerë, Arbënor Dehari dhe Astrit Dehari.

Familja Dehari është kthyer për të jetuar në Kosovë nga Zvicra me 1999, e kryefamiljari Avni Dehari është veprimtar i hershëm i çështjes kombëtare, poet dhe ish-kryeredaktor në “Zëri i Kosovës”.

Arbënori atëherë thoshte se dallimi në mes të jetës në Zvicër është shumë i madh. “Dallimi në mes të jetës në Zvicër është shumë i madh, nëse dëshirojmë ta bëjmë krahasimin në aspektin e kushteve të jetesës, por nëse ne të rinjtë nuk punojmë këtu për të ndërtuar shtetin, kush duhet ta bëjë”, ishte shprehur ndër të tjera në këtë dokumentar, Arbënor Dehari.

Edhe vëllai i tij, Astriti, ishte shprehur se nuk mund të paramendojë të jetojë në Zvicër, përveç në vizitë apo për pushime që thotë se mund ti kalonte atje.