Hotel “amerikan” midis Tiranës

Një objekt tjetër hotelier që i ngjason atyre amerikane e evropian “Hotel Plaza’ që u lëshua dje në shërbim për klientë e biznese

Për dekada me radhë, qytetarët e Shqipërisë nga të gjitha viset, ëndërronin ta kenë një foto para hotelit 15 katësh “Tirana Internacional”, që ishte objekti më i lartë në Shqipërinë komuniste. Tani ata mund të krenohen me një objekt tjetër hotelier që i ngjason atyre amerikane e evropian “Hotel Plaza’ që u lëshua dje në shërbim për klientë e biznese.

Plaza është hoteli më i ri me 5 yje. I filluar gati 15-vjet më parë, objekti ka një kapacitet prej 190 dhomash dhe 23 kate. Nga dita e djeshme hoteli është në shërbim kryesisht klientëve të biznesit, por jo vetëm, shkruan TCH.

Dhomat janë të ndara në 4 kategori: business, superior, de lux dhe suita. Këto të fundit variojnë nga suita normale, ekzekutive dhe qershia mbi tortë, suita presidenciale.

“Kjo është suitë që i ka të gjitha parametrat, kemi një kinema, kemi një zyrë brenda, kemi një banjo turke që është me banjo avulli, gjithashtu edhe dy tualete të tjera që e plotësojnë këtë suitë. Është suita më e shtrenjtë që ne ofrojmë. Kemi pasur shumë VIP-a. Ka qenë Dua Lipa, Bebe Rexha dhe shumë të tjerë. Chris Brown ka qenë i pari që ka fjetur këtu, që e ka inauguruar si vend”, thotë Ledio Pano.