Hoti e Vuçiq flasin nesër në samitin virtual të liderëve të Ballkanit Perëndimor

Këshilli Atlantik ka paralajmëruar se nesër do të mbahet një samit virtual me liderët e shteteve të Ballkanit Perëndimor.

Në samit do të marrë pjesë edhe kryeministri i Kosovës, Avdullah Hoti, si dhe presidenti i Serbisë, Aleksander Vuçiq.

Përpos Kosovës dhe Serbisë, në këtë samit do të marrin pjesë edhe Shqipëria, Mali i Zi, Bosnjë e Hercegovina dhe Maqedonia e Veriut.

Në njoftimin e Këshillit thuhet se folësit kryesorë do të jenë Avdullah Hoti, Aleksander Vuçiq, Stevo Pendarovski, Zoran Tegeltija dhe Dragica Sekulic.

Tutje Këshilli Atlantik njofton se lidhur me këtë samit, gjashtë shtetet e Ballkanit Perëndimor janë pajtuar për veprime praktike për të çuar përpara bashkëpunimin rajonal ekonomik.

“Këta hapa konkretë do të ndihmojnë rajonin të dalë nga ndikimi shkatërrues i COVID-19 me mundësi më të mëdha të zhvillimit ekonomik. Kjo marrëveshje do të tregojë përkushtimin e udhëheqësve për të nxitur rritjen ekonomike duke ndjekur lëvizjen e lirë të mallrave, personave dhe shërbimeve përtej kufijve të rajonit. Masa gjithashtu do të vërë në lëvizje një plan të rëndësishëm për tërheqjen e investimeve të huaja dhe përshpejtimin e vendosjes efektive të fondeve të rimëkëmbjes nga COVID-19″, thuhet në njoftimin e Këshillit Atlantik, përcjell albinfo.ch.

Këshilli Atlantik është një organizatë jopartiake me bazë në kryeqytetin amerikan Washington D.C.