Hoxhaj: Malazezët së shpejti kategori kushtetuese në Kosovë

Ministri i Jashtëm i Kosovës, Enver Hoxhaj, e ka njoftuar homologun e tij malazias, Milan Roçen, se janë krijuar kushtet që komuniteti malazias në Kosovë të zërë vend së shpejti në Kushtetutën e Kosovës, është bërë e ditur në Podgoricë.

Ministria e Jashtme e Malit të Zi, ka bërë të ditur se Ministri Hoxhaj ia ka dërguar një letër Ministrit Roçen në të cilën e njofton atë për aktivitetet e ndërmarra me synim të njohjes kushtetuese të komunitetit malazias në Kosovë.

Sipas njoftimit të publikuar në faqen zyrtarë të kësaj minitrie, Minitri Hoxhaj, ka thënë se më 15 janar ka hyrë në fuqi ligji që është bazë për ndryshimet kushtetuese në Kosovë gjatë 2012, ku një prej qëllimeve është edhe futja e komunitetit malazias si kategori kushtetuese, raportojnë mediat e rajonit.

”Me këtë pozicioni dhe të drejtat e malazezve në Kosovë do të vendosen në baza të barabarta me bashkësitë e tjera në Kosovë, ka shkruar Hoxhaj.

Në letër thuhet se edhe me ligj mundësohet pjesëmarrja e dy përfaqësuesve të komunitetit malazias në Këshillin Konsultativ për Komunitete, që përbëhet nga përfaqësuesit e të gjitha bashkësive në Kosovë, Qeverisë së Kosovës, Zyrës së presidentit dhe agjencive relevante.

”Këshilli konsultativ do të përbëhet nga dy përfaqësues të romëve, egjiptianëve, ashkalinjve, goranëve, malazezve dhe kroatëve, prej të cilëve njëri mund të jetë deputet në Kuvendin e Kosovës”, theksohet në letrën e Ministrit Hoxhaj dërguar Ministrit Roçen.