Hungari, një kosovar vdes nga të ftohtit

Mediet hungareze raportojnë se kosovari ka vdekur nga të ftohtit në vijën kufitare ndërmjet Serbisë e Hungarisë, ndërsa është gjetur nga policia hungareze

Një qytetarë i Kosovës ka vdekur në kufirin Serbi-Hungari, gjatë përpjekjes për të kaluar në vendet e Bashkimit Evropian. Mediet raportojnë se ai ka vdekur nga të ftohtit në vijën kufitare të Hungarisë, ndërsa është gjetur nga policia e këtij shteti. Kjo është viktima e parë e ikjes së fundit masive të kosovarëve drejt BE-së.

Lajmin e ka transmetuar “Index.hu”, e cila raporton se me të kaluar kufirin me Hungarinë, personi që është ngrirë nga të ftohtit është nga Kosova. Këtë informatë, ky  medium e mbështet në deklaratën e një dëshmitar, i cili i ka thënë se e njeh këtë person dhe se ai është kosovar.

Ndërkaq edhe në raportin e Policisë hungareze, është shkruar se në orën 14:20 derisa po patrullonin rreth kufirit, 15 metra larg tij kanë gjetur një trup të pajetë.

Menjëherë pas këtij lajmi ka reaguar partia opozitare, Aleanca për Ardhmërinë e Kosovës (AAK) e cila thotë se ky rast, është më i rëndi prej tragjedisë së lumit Tisa, kur akisidenatlisht humbën jetën disa kosovarë.

“AAK e përcjellë shqetësimin e thellë me këtë rast, i cili pas Tragjedisë “Tisa” është një prej më të rëndëve në kuadër të braktisjes masive të vendit nga të rinjtë dhe familje të tëra kosovare, si pasojë e jetës së rëndë e të paperspektivë në vend”, thuhet në reagimin e kësaj parti.