Hungaria do t’i kthejë të gjithë azilkërkuesit kosovarë

Ambasadori i Hungarisë në Kosovë, Lorent Balla i tha ministrit të brendshëm, Skender Hyseni, se autoritetet hungareze do t’i riatdhesojnë të gjithë azilkërkuesit kosovarë

Autoritetet e Hungarisë do t’i kthejnë në Kosovë të gjithë ata kosovarë që kanë kërkuar azil të rrejshëm në këtë shtet. Kështu deklaroi të hënën, ambasadori i Hungarisë në Kosovë, Lorent Balla, gjatë një takimi që zhvilloi me Ministrin e Punëve të Brendshme, Skender Hyseni.

Balla tha se Hungaria të gjithë qytetarëve të Republikës së Kosovës që kërkojnë azil, u ofron kushtet standarde për jetesë, ndërsa menjëherë pas përfundimit të procedurave administrative, ata qytetarë riatdhesohen.

Ministri Hyseni e njoftoi ambasadorin Balla me prioritetet e Ministrisë së Punëve të Brendshme, duke u fokusuar në veçanti në adresimin e sfidave të sundimit të ligjit dhe sigurisë në mbarë territorin e vendit.

Ndryshe, rreth 4000 kosovarë kanë kërkuar azil në Hungari vetëm gjatë muajve të fundit. Shumica prej tyre janë ndalur në shtetin hungarez, gjatë përpjekjes për të ikur në shtetet tjera evropiane, Francë, Gjermani, Austri e Zvicër. Javën e kaluar në kufirin hungarez u gjet një kosovar i vdekur nga të ftohtit.