Hungaria nuk u jep azil kosovarëve

Ambasada e Hungarisë në Prishtinë ka raportuar për një valë të re të kosovarëve, ndërsa ka ritheksuar se shteti hungarez nuk jep azil për kosovarët

Ministri në detyrë i Punëve të Brendshme iu ka bërë thirrje qytetarëve të Kosovës që mos të imigrojnë ilegalisht, sepse asnjë shtet i Bashkimit Evropian nuk jep azil për kosovarët. Kjo kërkesë e ministrit ka ardhur pas raportimit se vetëm në Hungari gjatë këtij viti kanë kërkuar azil rreth 7 mijë kosovarë.

“Qytetarët kanë të drejtë të kërkojnë jetë më të mirë por, asnjë shtet evropian nuk jep azil për kosovarët”, ka deklaruar Rexhepi.

Vetëm brenda këtij viti, shtatëmijë qytetarë të Kosovës kanë kërkuar azil në Hungari. Shumica prej tyre kufirin e kaluan në mënyrë ilegale, ndërsa shteti hungarez këtë vit nuk ia ka njohur statusin e refugjatit asnjë qytetari të Kosovës.

Ambasada e Hungarisë në Prishtinë ka raportuar për një valë të re të kosovarëve, ndërsa ka ritheksuar se shteti hungarez nuk jep azil për kosovarët.

“Të gjithë ata që hyjnë ilegalisht në Hungari, merren në mbajtje nga policia, e pas disa verifikimeve që u bëhen kthejnë në Kosovë. Në rast të kërkesës për azil ata mund të mbahen në paraburgim në periudhë prej 3-60 ditë, për ta verifikuar nëse i takon apo jo azili”, thuhet në njoftimin e ambasadës.

Ministri Bajram Rexhepi tha për RD se organet e sigurisë janë të përkushtuara në parandalimin dhe kapjen e personave të cilët merren me kontrabandimin e njerëzve.

Mirëpo, vetëm javën e fundit, deri në katër autobus në ditë me qytetarë, kryesisht nga rajoni i Ferizajt, po nisen për në Serbi, që pastaj përmes Hungarisë të hyjnë në shtetet tjera. Imigrantët shqiptarë e kanë si target Francën, e cila Kosovën e ka larguar nga vendet e sigurta.