Identifikohen 47 viktima të luftës

Mbetjet mortore, në mesin e të cilave edhe katër fëmijë, janë identifikuar nga Instituti i Mjekësisë Ligjore. Varrimi do të bëhet më 26 mars në Krushë dhe Rahovec

Në Suharekë dhe në Krushë të Vogël të Rahovecit do të varrosen 47 trupat e shqiptarëve të Kosovë, që ishin vrarë gjatë luftës së fundit nga forcat ushtarake dhe paraushtarake serb. Mbetjet mortore, në mesin e të cilave edhe katër fëmijë, janë identifikuar nga Instituti i Mjekësisë Ligjore.

Ky është njëherësh numri më i madh i viktimave që do t’u dorëzohen familjarëve që prej vitit 2006, derisa vazhdojnë të mbesin ende edhe 1700 persona të pagjetur.

Një punë e madhe dhe e mundimshme është bërë derisa kanë mbërritur në këtë moment, kanë thënë përfaqësuesit e Institutit të Mjekësisë Ligjore. Mbetjet e viktimave të luftës së fundit, pasi janë identifikuar, janë vendosë në arkivolet e mbuluar me flamujt kuqezi.

Të hënën dhe të martën, familjarët e të identifikuarve do të vizitojnë Institutin për përfundimin e procedurave, para se të dërgohen për rivarrim, raporton KTV.

Arsim Gërxhaliu është drejtor i institut për Mjekësi Ligjore. Ai tha se në mesin e viktimave që janë identifikuar janë edhe katër fëmijë të vrarë në vitin 1999. Në komunën e Suharekës mbesin edhe më shumë se 100 të pagjetur, derisa varrimi i të identifikuarve do të bëhet më 26 mars.

Kjo datë përkon edhe me përvjetorin e masakrës së vitit 99 në këtë komunë, ku u vranë 50 persona, 47 nga ta të familjes Berisha. Krusha e Vogël e Rahovecit, ndërkaq pret të marrë vesh për fatin e 86 banorëve të saj, ndërsa në mbarë Kosovën mbesin mbi 1700 të pagjetur.

Në luftën e viti 1998-1999 në Kosovë janë zhdukur rreth 4 mijë persona, shumica dërmuese shqiptarë. Trupat e më shuamë se dy mijë prej tyre, janë identifikuar nëpër varreza masive në Serbi, si në Batajnica, Bajna-Bashta, Peruçac, etj.

Disa trupa janë gjetur edhe në kontejnerë në lumin Danub, ndërsa me ndihmën e Kryqit të Kuq Ndërkombëtarë janë kthyer dhe varrosur në Kosovë.

Forcat e kombinuara serbe, ushtarët, policët, njësitë speciale dhe forcat paraushtarake, për t’i fshehur gjurmët e krimit, disa nga trupat e të vrarëve i kishin marrë me vete në Serbi. Për këto krime, Trubunali Penal i Hagës ka dënuar disa nga udhëheqësit e asaj lufte, ndërsa disa të tjerë janë në gjykim e sipër.