Ikën policia, banorët kthehen në Lagjen e Trimave

Shtëpi të demoluara, gëzhoja plumbash, erë baroti, dyqane të thyera, ndërsa të qara nga plumbat e granatat shihen kudo nëpër lagjen që dikur njihej si “Divna Sela”

Policia e Maqedonisë është tërhequr nga Lagjja e Trimave në Kumanovë, duke lënë mbrapa gjurmët e një luftë të vërtetë si ajo e vitit 2001. Shtëpi të demoluara, gëzhoja plumbash, erë baroti, dyqane të thyera, ndërsa të qara nga plumbat e granatat shihen kudo nëpër lagjen që dikur njihej si “Divna Sela”.

Siç raportojnë burimet nga Kumanova, pas kthimit në lagje shumë banorë janë shprehur të zhgënjyer me atë që kanë parë. Disa, me lot në sy, apelojnë nga komunitete ndërkombëtarë, që të ndriçohet gjithçka lidhur me dëmin që kanë pësuar dhe skenarin që ndodhi në vendbanimin e tyre.

“Kjo është shtëpia e fqinjëve të mi dhe është e dëmtuar plotësisht. Kjo është e paparë që ka ndodhë dhe një tmerr i vërtetë që nuk ka ndodhur as në luftëra më të ashpra. Nuk dijmë çfarë fati do të pësojmë dhe a do të vijë dikush në ndihmën tonë”, theksoi një banorë i Lagjes së Trimave, citon INA.

Një pjesë e madhe e banorëve nuk janë kthyer në shtëpitë e tyre dhe se mësohet se pjesa më e madhe e tyre nesër do të kthehen pranë vatrave të tyre.

Para se të hyjnë banorët në lagje, fushëbetejën e vizituan vëzhguesit e OSBE-së, të cilët ende po vazhdojnë ekspertizën dhe verifikimin e gjendjes në terren. Policia kërkoi banorët të lirojnë edhe pjesën në sheshin në të cilin zakonisht zhvillohet pazari, në mënyrë që të pastrohet e gjithë Lagja e Trimave në Kumanovë.