Imigrimi, rriten kërkesat në ofiqari

Kryetari i Prishtinës, Shpend Ahmeti e raporton si shqetësim rritjen e kërkesave për dokumente të ofiqarisë, për të ikur jashtë vendit. Edhe në Gjilan është e njëjta situatë

Në sportelet e Komunës së Prishtinës, por edhe në atë të Gjilanit, janë shtuar kërkesat e qytetarëve për t’u pajisur me certifikata të lindjes për t’i shfrytëzuar për imigrim. Këtë problematikë e ka ngritur edhe kryetari i Komunës së Prishtinës, Shpend Ahmeti duke e parë si mjaftë shqetësuese.

Ahmeti nëpërmjet rrjetit social ka dhënë një mesazh për qytetarët, duke iu rekomanduar që mos ta marrin botën në sy.

“Këto ditë në komunën e Prishtinës janë shtuar tepër shumë kërkesat për dokumente të ofiqarisë. Duke parë fluksin e madh kemi kërkuar më shumë informata nga qytetarët. Pjesa më e madhe janë qytetarë që po kërkojnë rrugën drejt Evropës. Të premte ka patur më shumë kërkesa të tilla se sa aplikacione të rregullta që i kemi çdo javë”, thotë Ahmeti.

Ai thotë se secili prej qytetarëve i ka hallet e vete dhe secili e ka për qëllim një jetë më të mirë, por numrat e refuzimit të azilkërkuesve gjatë këtyre ditëve, sipas tij, kanë arritur në përqindjet absolute.

“Kosovën duhet ta shpëtojmë nga keqbërësit e të korruptuarit sa më parë, sepse po e lejuam kështu, do të kemi edhe më shumë qytetarë të kthyer nga burgjet e urat e Evropës por tash më pa shtëpi e me borxhe”, ka thënë Ahmeti.

Po ashtu thuhet se fluksi i qytetarëve për t’u pajisur me certifikata të lindjes, madje dhe me fotografi, është rritur dukshëm edhe në komunën e Gjilanit, e cila është më e drekuara nga imigrimi i këtyre ditëve.

Agim Velekinca, shef i Shërbimit të Gjendjes Civile në Gjilan, thotë për “Zërin” se kohëve të fundit ka fluks të madh për t’u pajisur me certifikata e ekstrakte. “Është shumë e dhimbshme kur dikush lutet që t’i ndihmohet dhe kur kërkojnë që certifikatave t’u vihen fotografi për të kaluar kufirin, sikurse edhe vërtetime për identitetin”, thotë ai.