Incidentet mund të rrezikojnë Maqedoninë

Komisari i lartë për pakicat kombëtare i OSBE-së, Knut Volebek ka tërhequr vërejtjen lidhur me incidentet e fundit ndëretnike në Maqedoni.

“Maqedonia, si demokraci e re po përballet me një seri sfidash. Vendi shumë përparoi pas konfliktit të vitit 2001, por seria e incidenteve dhe ngjarjeve në Strugë përkujtojnë se incidentet ndëretnike dhe religjioze nuk i takojnë vetëm të kaluarës dhe nëse ato nuk ndalohen mund ta rrezikojnë shoqërinë”, ka deklaruar Volebek në fjalimin para Komitetit për marrëdhënie mes komuniteteve në Parlamentin e Maqedonisë, raportojnë mediat e Maqedonisë.

Sipas tij, nuk janë të nevojshme situata si djegia e flamujve dhe përdhosjen e objekteve fetare që të ketë debat për dukuritë e tilla.

Ambasadori Vollebek gjithashtu bëri thirrje për reforma në arsim dhe vendosjen e arsimit të integruar si dhe mënyrën më të mirë për parandalimin e tensioneve në shoqëritë multietnike. Vollebek në Maqedoni ka takuar krerët e shtetit dhe lider partish politike.