Interesim i madh për të parë miqësoren Kosovë-Haiti

Vetëm brenda dy orësh, janë shitur mbi 9 mijë bileta, ndërsa në treg kanë mbetur shumë pak të tjera. Stadiumi “Adem Jashari” ka kapacitete prej 18 mijë vetash

Ndeshja e parë miqësore që Kombëtarja kosovare e Futbollit zhvillon kundër reprezentacionit të Haitit me 5 mars në Mitrovicë, ka ngjallë interesim të jashtëzakonshëm të qytetarëve për të parë ndeshjen.

Vetëm brenda dy orësh, janë shitur mbi 9 mijë bileta, ndërsa në treg kanë mbetur shumë pak të tjera.

Ndër të parët që e mori biletën, ishte kryeministri Hashim Thaçi bashkë me djalin e tij Endrit Thaçin, ndërsa disa bileta i ka blerë edhe përgjegjësi i kombëtares, Albert Bunjaku.

Agron Selimi është menaxher i kompanisë AT&Event, e cila e ka organizuar këtë ndeshje. Ai i ka thënë se brenda dy orësh janë shitur 9 mijë bileta, ndërsa edhe 3 mijë sosh, siç tha ai, janë të ndara për tifozët, që dëshmon se rreth 70 për qind e biletave janë shitur menjëherë.

Biletat janë paraparë që shiten deri në ditën e ndeshjes në shtatë qendra të Kosovës: Prishtinë, Peja, Mitrovica, Gjilani, Prizreni, Ferizaj dhe Gjakovë.

Në treg kanë dalë 15 mijë bileta, derisa Selmani beson se ato do të shiten sot. “Unë kam thënë që për 48 orë do të shiten të gjitha biletat. Kurse, si duket këto do të shiten edhe më shpejtë”, citon Selimin gazeta “Express”.

Në qytetin e Mitrovicës ka pasur tollovi për shkak të biletave të ndeshjes Kosovës – Haiti. Madje, policia e Kosovës e ka ndërprerë shitjen për shkak të kërkesave të mëdha për biletë.

“Në Mitrovicë kanë qenë 1 mijë bileta të cilat janë shitur menjëherë. Kurse, pas kësaj është krijuar tollovi dhe shitja është ndërprerë përkohësisht nga Policia për shkak të tollovisë”, ka deklaruar Selani.

Ndryshe, biletat kanë çmimin 5, 7, dhe 10 euro, derisa për tifozët që do të vendosen në pjesën veriore të stadiumit, bileta do të ketë çmimin 3 euro. Sipas disa qytetarëve, çmimi i biletave për ndeshjen Kosova-Haiti është pak shtrenjtë, por sipas tyre, për një ndeshje ndërkombëtare është çmim i arsyeshëm.

Ndeshja ndërmjet Kosovës dhe Haitit do të zhvillohet në Stadiumin Olimpik “Adem Jashari” në Mitrovicë. Ky stadium që konsiderohet më i mirë në Kosovë, ka kapacitet prej 18 mijë ulësesh. 200 vende tashmë janë të rezervuara për personalitetet që njihen si VIP-a.

Përzgjedhësi i Kosovës, Albert Bunjaki do ta publikoj sot listën se me cilët futbollist do të futet në fushë në ndeshjen e parë ndërkombëtare të Kosovës kundër Haitit me 5 mars.

Në mesin e emrave pritet që të jenë, Samir Ujkani, Emir Bajrami, Lorent Sadiku, Arlind Ajeti. Në këtë ndeshja nuk do të luajnë yjet, si Jonuzaj, Shaqiri, Xhaka, Behrami…