Investimet e mërgimtarëve, ana tjetër e medaljes

Rreth 400 mijë shqiptarë të Maqedonisë jetojnë në diasporë, ndërsa një numër i vogël i tyre investojnë në vendlindje

Marrë nga përqindja e popullsisë, Maqedonia përben numrin madh të mërgimtarëve shqiptarë që kanë emigruara nëpër vendet e ndryshme të botës. Derisa mërgata kosovare dhe ajo në Shqipëri konsiderohet relativisht e re, nga vitet 60-ta e këndej, në Maqedoni mërgimtarët shqiptarë, rrugën e kurbetit e kanë nisur një shekull më parë.

Përveç boshatisjes, dhimbjeve dhe vuajtjeve, diaspora ka ndikuar edhe për të mirë në këtë shtet, për faktin se shumë mërgimtarë pasurinë që e kanë fituar atje, e kanë investuar në vendlindje, duke u bërë afaristët më të suksesshëm të kësaj plejade.

Sipas gazetës “Koha” të Shkupit, rreth 400 mijë shqiptarë jetojnë në mërgim, ndërsa numri më i madh prej tyre janë në Evropë, Shtetet e Bashkuara të Amerikës, Australi, Kanada e në vendet tjera. Supozohet se rajoni i Dibrës, Prespës, Strugës, Kërçovës, Tetovës, Likovës e Gostivarit, janë ndër më të prekurat nga mërgimi.

Edhe pse shumë vite më parë kishin emigruar në vendet e botës, shumë mërgimtarë po japin kontributin e vet në drejtim të komunave me banorë kryesisht shqiptarë, respektivisht duke investuar në biznese të vogla a të mëdha. Sipas Agjencisë së Migracionit, në rajonin e Gostivarit dhe Tetovës janë investuar një varg investimesh nga diaspora shqiptare.

“Koha” përmend disa nga afaristët më të suksesshëm shqiptarë që jetojnë në Maqedoni: Azem Abdurrahimi, Nagip Fejzi, Shefki Idrizi, Dashmir Saliu, Xhelal Jakupi, Fatmir Emini, Idriz Kadriue Ramadan Veseli, Nazmi dhe Nexhat Limani etj.

Zëvendësdrejtori i Agjencisë së Migracionit, Osman Shukriu thotë se një nga kompetencat kryesore të institucionit të tij është të jenë më afër diasporës, për të bindur ata që të kthehen në vendlindje, të investojnë. “Janë disa investime në pjesën e Tetovës, Gostivarit, Prespës, Strugës dhe shpresoj se edhe në të ardhmen, do të ketë akoma të tilla”, tha ai.

Ndryshe, sipas Shukriut, para disa viteve është festuar 100 vjetori i prespanit të parë të shkuar në Amerikë. “Shqiptarët që para 100 viteve kanë shkuar në kurbet, duke filluar që nga Prespa e gjitha trojet shqiptare. Prandaj ne në Maqedoni, llogaritet që kemi rreth 400 mijë shqiptarë në diasporë. Duke patur parasysh se më shumë kemi në Evropë dhe të tjerët janë në SHBA, Australi, Kanada dhe në vendet tjera”, thotë ai

Sipas një statistike jozyrtare, rreth 400 mijë shqiptarë nga Maqedonia jetojnë në Diasporë, prej tyre 244 mijë në Evropë, 93 mijë në Australi dhe rreth 43 mijë në Shtetet e Bashkuara të Amerikës, ndërsa ka edhe të atillë që jetojnë nëpër kontinentet tjera.