IPA për Kosovën 66 milionë €

Ministri kosovar i Integrimit Evropian, Bekim Çollaku ka nënshkruar sot në Prishtinë Marrëveshjen Financiare vjetore në mes të Qeverisë së Kosovës dhe Bashkimit Evropian (BE) në kuadër të Instrumentit të Asistencës së Para-Anëtarësimit (IPA) në vlerë mbështetëse prej 66 milionë eurosh.

Në emër të Bashkimit Evropian, kjo Marrëveshje është nënshkruar nga drejtori për Ballkanin Perëndimor në Komisionin Evropian, Jean-Eric Paquet

Nën programin vjetor të veprimit të IPA-s për Kosovën, do të mbështeten sektorët: Demokracia dhe Qeverisja; Sundimi i Ligjit dhe të Drejtat Themelore të Njeriut; Energjia; Konkurrueshmëria dhe Inovacioni; Bujqësia dhe Zhvillimi Rural. Projektet e parapara të mbështeten me këtë Program, do të fillojnë së zbatuari në fillim të vitit 2016.

“Sa i përket demokracisë dhe qeverisjes, fokus i veçantë do t’i kushtohet përpjekjeve për përmirësimin e administratës publike në Kosovë, me qëllim që t’i mundësohet asaj transpozimi, aplikimi dhe zbatimi i “acquis” të BE-së, veçanërisht në fushat e mbuluara nga Marrëveshja për Stabilizim dhe Asociim (MSA)”, thuhet në njoftimin e Ministrisë së Integrimeve.

Programi do të mbështesë gjithashtu shoqërinë civile në ngritjen e efikasitetit dhe në pjesëmarrjes së tyre në procesin e politik-bërjes.

Ndryshe, nga kjo shumë e mjeteve të IPA-s, 10.5 milionë euro do të shkojnë në bujqësi. “Për sektorin e bujqësisë dhe zhvillimit rural, veprimet e parapara do të ndihmojnë në përmirësimin e konkurrushmërisë së sektorit agro-ushqimor në Kosovë, përmirësimin e kushteve të jetesës për popullatë në zona rurale, përmirësimin e sigurisë së ushqimit dhe rritjes së aftësisë së eksportit të sektorit agro-ushqimor. Shuma financiare për ketë sektor do te përfshije 10.5 milionë euro”.