Ish-kryediplomatja gjermane Anna Baerbock zgjidhet Presidente e Asamblesë së Përgjithshme të OKB-së

Ish-ministrja e Jashtme gjermane, Annalena Baerbock, është zgjedhur Presidente e re e Asamblesë së Përgjithshme të Kombeve të Bashkuara. Politikania 44-vjeçare e Partisë së Gjelbër mori një shumicë të madhe votash, pavarësisht një manovre penguese nga Rusia.

Në një votim të fshehtë të kërkuar nga Moska në organin më të madh të OKB-së, Baerbock mori 167 vota. 14 shtete abstenuan, ndërsa 7 të tjera votuan për kandidaten e mëparshme gjermane, Helga Schmid, transmeton albinfo.ch.

Posti i Presidentes së Asamblesë së Përgjithshme ka më tepër rëndësi protokollare dhe nuk duhet ngatërruar me rolin e Sekretarit të Përgjithshëm të OKB-së, António Guterres.

Votimi nën hije përplasjeje diplomatike

Sipas burimeve diplomatike, Rusia kërkoi një votim të fshehtë  një veprim i pazakontë, pasi zakonisht ky post miratohet me konsensus dhe pa votim formal. Fletët e votimit përmbanin vetëm emrin e Baerbock, me mundësi për të abstenuar ose për të shtuar një tjetër emër.

Në javët e fundit, Rusia nuk ka fshehur qëndrimin e saj kritik ndaj Baerbock, duke e konsideruar atë si “të njëanshme në mënyrë të skajshme”, për shkak të qëndrimit të saj të ashpër ndaj Moskës pas pushtimit rus të Ukrainës.

Fillimisht ishte propozuar diplomatja gjermane Helga Schmid, e cila gëzonte edhe mbështetjen e Rusisë. Baerbock u përfshi në garë relativisht vonë, pas humbjes së saj në zgjedhjet federale.