Ish-kryetari i Gjakovës, akuzohet për keqpërdorim

Pal Lekaj, ish kryetar i Gjakovës dhe dy bashkëpunëtorët e tij, akuzohen se në vitin 2012,  kanë tejkaluar kompetencat dhe autorizimet e tyre më qëllim që të përfitojnë çfarëdo dobie për vete apo personin tjetër

Nën dyshimin “për keqpërdorim të detyrës zyrtare”,  Prokuroria Speciale e Republikës së Kosovës ka ngritur aktakuzë kundër ish kryetarit të Gjakovës dhe njëherësh deputetit të Kuvendit të Kosovës nga radhët e AAK-së, Pal Lekaj dhe dy ish bashkëpunëtorëve të tij. Aktakuza u ngrit pranë Departamentit për Krime të Rënda të Gjykatës Themelore në Gjakovë.

Të pandehurit akuzohen për veprën penale: “Keqpërdorimi i pozitës apo autoritetit zyrtar”.

“I akuzuari i parë, ish – Kryetar i Komunës, Pal Lekaj së bashku me ish-Drejtorin për Buxhet dhe Financa dhe me ish-menaxherin e Prokurimit, po të njëjtës komunë gjatë muajit mars të vitit 2012, në bashkëkryerje duke kontribuar esencialisht në raport me njëri tjetrin, duke shfrytëzuar detyrat apo autoritetin zyrtar kanë tejkaluar kompetencat dhe autorizimet e tyre  më qëllim që të përfitojnë çfarëdo dobie për vete apo personin tjetër, që ti shkaktojnë  dëm Komunës dhe banorëve të saj”, thuhet në aktakuzë.

Aktakuzën e ka ngritur një prokuror vendor nga Prokuroria Speciale e Republikës së Kosovës, i cila i ka propozuar Gjykatës që të pandehurit, për veprën penale që akuzohen, t’i shpallë fajtor dhe t’i gjykojë sipas ligjit.

I menjëhershëm ishte reagimi i deputetit Lekaj. Ai thotë se “në këtë kohë kur Kosova po kalon nëpër sfida të mëdha, e opozitarizmi bashkë me qytetarët e Kosovës është si kurrë më parë kundërshtuese e të këqijave që po i kanosen Kosovës, dalin të tilla lajme denigruese, totalisht të ndikuara nga politika e lidhjeve të shkurtëra”.

“Kjo tregon se kësaj qeverie i është ngushtuar rrethi dhe prandaj tani kanë filluar që në emër të drejtësisë të bëjnë “luftën e shtrigave”. Jam plotësisht i pastër në të gjitha përgjegjësitë që i kam pasur dhe çdo herë kam qenë në shërbim të qytetarëve dhe të Kosovës. Unë nuk kam asgjë zyrtare dhe nuk dua të lëshohem në komentime me tutje, përveç që nuk do të mundet askush të na gjunjëzoj”, thotë Lekaj.