Italia zbaton ndalimin e telefonave edhe për nxënësit e shkollave të mesme

(KEYSTONE/Christian Beutler)

Pas pushimeve verore, nxënësit e shkollave të mesme në Itali nuk do të mund të përdorin më telefonat celularë gjatë orëve mësimore, sipas një vendimi të ri të Ministrisë së Arsimit.

Ndalesa, e cila më parë aplikohej kryesisht për nxënësit më të rinj, tani do të zgjerohet edhe për maturantët. Vendimi përjashton rastet e veçanta kur telefoni është i domosdoshëm për shkak të nevojave specifike ose aftësive të kufizuara të nxënësit, transmeron albinfo.ch.

Ministri i Arsimit, Giuseppe Valditara, pjesë e partisë Lega, deklaroi se qëllimi është krijimi i një mjedisi më të qetë në klasa dhe rikthimi i përqendrimit tek mësimi. Ai iu referua studimeve të ndryshme që sugjerojnë se përdorimi i tepërt i pajisjeve celulare ndikon negativisht në shëndet dhe rezultatet shkollore.

Në mënyrë formale, Italia ka pasur një politikë të ndalimit të celularëve në shkolla, por zbatimi i saj nuk ka qenë gjithmonë i rreptë. Kjo nismë e re synon të forcojë zbatimin dhe të shmangë shpërqendrimet në klasë.

Ministria, që tani mban emrin “Ministria e Arsimit dhe Meritës” si pjesë e vizionit të qeverisë aktuale për të theksuar rëndësinë e arritjeve individuale, vazhdon të promovojë një qasje më rigoroze ndaj disiplinës në sistemin arsimor.