Izraeli liron pengjet, zbatimi i marrëveshjes fillon të dielën

Keystone EPA/HAITHAM IMAD

Armëpushimi në Rripin e Gazës duhet të fillojë të dielën siç ishte planifikuar, pavarësisht nevojës që negociatorët të firmosin marrëveshjen në minutën e fundit. Kështu ka bërë të ditur Sekretari Amerikan i Shtetit, Antony Blinken në një konferencë për mediat.

Izraeli ka shtyrë mbledhjen e kabinetit për të ratifikuar armëpushimin me Hamasin, pasi fajëson grupin militant, edhe pse avionët luftarakë izraelitë goditën Gazën me sulme ajrore duke vrarë 77 njerëz brenda një dite.

“Për armëpushimin, kam besim dhe pres plotësisht që zbatimi do të fillojë, siç thamë, të dielën. Nuk është për t’u habitur që në një proces, në një negociatë, ka qenë kaq sfidues dhe kaq i ngarkuar. Unë kam qenë në telefon, në një mënyrë ose në një tjetër, me miqtë tanë nga Katari, dhe kam shumë besim se kjo po ecën përpara dhe ne do të shohim fillimin e zbatimit të marrëveshjes të dielën”, tha Antony Blinken, sekretari Amerikan i Shtetit.

Ndërkohë kabineti izraelit është planifikuar të mblidhet të premten për të miratuar marrëveshjen e armëpushimit dhe lirimin e pengjeve, tha një zyrtar izraelit, citon CNN. Takimi i kabinetit do të vijë një ditë më vonë se sa ishte planifikuar fillimisht të mbahej, pasi zyra e kryeministrit izraelit Benjamin Netanyahu tha se pengesat e minutës së fundit ende po zgjidheshin në tryezën e bisedimeve në Doha. Vendimi për mbledhjen e kabinetit të premten tregon se ato çështje të pazgjidhura tashmë janë zgjidhur.

Një zyrtar amerikan, i cili foli në kushte anonimiteti për Reuters, tha se mosmarrëveshja e fundit e mbetur ishte mbi identitetin e disa të burgosurve që Hamasi donte të liroheshin.

Zëdhënësi i qeverisë izraelite, David Mencer, u tha gazetarëve se negociatorët izraelitë ishin në Doha për të arritur një zgjidhje. Marrëveshja komplekse e armëpushimit doli të mërkurën pas ndërmjetësimit të Katarit, Egjiptit dhe SHBA-së për të ndalur luftën që filloi me sulmet vdekjeprurëse të Hamasit ndaj Izraelit dhe pa forcat izraelite të vrasin dhjetëra mijëra palestinezë dhe të shkatërrojnë Gazën.