Jahjaga: Gruaja në Kosovë është simbol i paqes

Gruaja, gjatë periudhës së luftës në Kosovë ka qenë viktimë e dhunës, represionit dhe përdhunimit, tha presidentja e Kosovës, Jahjaga

Presidentja e Kosovës, Atifete Jahjaga mori pjesë të premten në panelin për sigurinë e gruas “Security is women’s work”, në ditën e ditë të punimeve të samitit “Women in the World”, që po i zhvillon punimet në Nju Jork të SHBA-së.

Në panel së bashku me presidenten Jahjaga morën pjesë edhe Janet Napolitano, sekretare në Departamentin e Sigurisë Kombëtare të SHBA-së, Jane Harman, drejtoreshë e Qendrës Woodrow Wilson, dhe Cathie Lanier, shefe e Departamentit të Policisë Metropolitane në Distriktin e Kolumbisë.

Në paraqitjen e saj, Jahjaga foli për rolin e gruas në Kosovë në periudhën para dhe pas luftës. Ajo tha se gruaja, gjatë periudhës së luftës në Kosovë ka qenë viktimë e dhunës, represionit dhe përdhunimit, të cilën periudhë e ka mbijetuar dhe sot gruaja është simbol i paqes dhe pajtimit dhe një forcë shtytëse e ndryshimeve dhe zhvillimit në shoqëri.

“Themel i sigurisë është gruaja – sepse siguria e saj nënkupton siguri për fëmijët, siguri për familjen dhe siguri për shoqërinë në përgjithësi”, tha ajo.

Duke folur për barazinë gjinore dhe rolin e gruas lidere në botë, presidentja kosovare tha se gratë janë më efikase dhe më të suksesshme si udhëheqëse dhe janë dëshmuar si vendimmarrëse të afta.

“Një nga këto tipare, sikundër e tha mbrëmë edhe ish-sekretarja amerikane e shtetit Madeleine Albright, është se gruaja është dëgjuese më e vëmendshme, por ajo ka edhe aftësi më të mëdha interpersonale. Ato shumë më lehtë përballen me situatat e krizave dhe janë dëshmuar të jenë më të përgjegjshme dhe më llogaridhënëse”, tha Jahjaga.

Të shtunën presidentja kosovare do të marrë pjesë në panelin e diskutimit për “Lideret Gra Botërore” (Women World Leaders: Force Multipliers), thuhet në kumtesën e Presidencës së Kosovës.