Jahjaga ia kthen Kuvendit në rishqyrtim Kodin Penal

"Me një vendim të tillë është shpëtuar Liria e Shtypit në Kosovë, e cila rrezikohej seriozisht nga përmbajtja e Kodit aktual"

Presidentja e Republikës së Kosovës, Atifete Jahjaga ka marrë vendim sot që t’ia kthejë Kuvendit të Republikës së Kosovës për rishqyrtim Kodin Penal të Republikës së Kosovës, Kodi Nr. 04/L-082, i miratuar në Seancën plenare të Kuvendit të Republikës së Kosovës më 20 prill 2012, dhe i pranuar në Zyrën e Presidentit të Republikës së Kosovës më 4 maj 2012.

Bazuar në kompetencat e Presidentes së Republikës së Kosovës, sipas nenit 84 pika 6 të Kushtetutës së Republikës së Kosovës, vendimi për rishqyrtimin e Kodit Penal u mor pasi u vlerësua se Neni 37 dhe Neni 38 i Kodit Penal janë në kundërshtim të plotë me Nenin 40 dhe Nenin 42 të Kushtetutës së Republikës së Kosovës, që rregullojnë lirinë e shprehjes dhe lirinë e medieve si dhe me Nenin 22, pika 2 të Kushtetutës së Republikës së Kosovës që obligon përmbushjen e Konventës Evropiane për mbrojtjen e të Drejtave dhe Lirive Themelore të Njeriut dhe Protokollet e saj.

Asociacioni i Gazetarëve Profesionistë të Kosovës mirëpret vendimin e Presidentes së Kosovës Atifete Jahjaga që të kthejë Kodin e Ri Penal në Parlamentin e Kosovës.

AGPK-ja vlerëson se me një vendim të tillë është shpëtuar Liria e Shtypit në Kosovë, e cila rrezikohej seriozisht nga përmbajtja e Kodit aktual. Ky asociacion falënderon gazetarët dhe mediet për unifikimin e jashtëzakonshëm në mbrojte të Lirisë së Shtypit, pa të cilin unifikim nuk do të mundësohej kjo mbrojtje. Gjithashtu ai falënderon partnerët vendës e ndërkombëtarë, organizatat, Zyrën e BE-së në Kosovë dhe ambasadat e akredituara në Prishtinë për mbështetjen e kërkesave të drejta të gazetarëve.

Njëherüësh i bën thirrje Parlamentit të Kosovës që të pranojë kërkesat e komunitetit të gazetarëve, po ashtu u bën thirrje subjekteve politike në pushtet dhe opozitë që të mbështesin kërkesat e gazetarëve.

AGPK-ja do të jetë në funksion të arsyetimit ligjor të kërkesave të komunitetit.