Jahjaga shtroi “Darkën e Lamës”

“Darka e Lamës” e cila sivjet u shtrua në mesditë, është bërë si festë tradicionale që shtrohet nga Presidentja me rastin e mbledhjes së prodhimeve bujqësore

Presidentja e Kosovës, Atifete Jahjaga e organizoi të shtunën Ditën e Falënderimit, apo siç quhet në opinion “Darka e Lamës”, e cila sivjet u organizua në Sheshin “Ibrahim Rugova” dhe ishte e hapur dhe për qytetarët e zakonshëm.

 

Në ceremoninë e kësaj dite ishin të pranishëm përfaqësuesit e institucioneve vendore e ndërkombëtare, ndërsa sofra e Presidentes ishte e mbushur me ushqime tradicionale shqiptare.

 

“Darka e Lamës” është bërë si festë tradicionale që shtrohet nga Presidentja me rastin e mbledhjes së prodhimeve bujqësore, ose me të filluar vjeshta e vonë.  

 

“Jemi mbledhur sot së bashku, të gjithë ne, qytetarët e Republikës së Kosovës,  me miqtë tanë, në këtë festë në përfundim të të korrave për t’iu gëzuar bereqetit që na e ka falur Zoti, në këtë tokë pjellore të vendit tonë”, tha në filli të ceremonisë presidentja Jahjaga.

 

Dita e Falënderimeve, sipas saj, është festa jonë tradicionale, e moçme që prej kohëve të dardanëve ilirë, që ka bashkuar të gjithë njerëzit e Kosovës me njëri-tjetrin dhe me të ardhmen e tyre.

 

“Kjo është një ditë që na mbledhë të gjithëve përreth sofrës sonë të begatë dhe kur bëhemi bashkë me më të dashurit tanë, pas punëve të kryera të stinës. Por gjithashtu kjo është një ditë kur duhet t’u shtrijmë dorën e ndihmës fqinjëve tanë dhe të gjithë atyre që kanë nevojë për ne”, tha Jahjaga.

 

Ai tha se në këtë ditë të gjithë duhet të jenë falënderues për sigurinë dhe përparimin e vendit tonë.

 

“Të jemi falënderues për tokën tonë të begatë dhe për bereqetin që na sjell ajo. Le të jemi falënderues për liritë tona, për të cilat kemi sakrifikuar aq shumë dhe për shëndetin e të gjithë qytetarëve tanë”, deklaroi më pas presidentja kosovare.

 

Jahjaga tha se në këtë ditë të festës tradicionale, tha se paqja ndërtohet me mirëkuptim dhe me respekt të ndërsjellë dhe ku qëndrueshmëria varet nga vetë qytetarët e devotshëm të këtij vendi, që duan ta gëzojnë të ardhmen e tyre.

 

“Le të punojmë sot, me më shumë besim në vetvete dhe me dashurinë për vendin tonë, të bashkuar dhe një, për ta bërë Kosovën pjesë të pandashme të botës së përparuar dhe një vend të dinjitetshëm për të jetuar”, tha Jahjaga, duke iu lutur Zotit për më shumë begati për Kosovën dhe popullin e saj.

 

---