Jasharaj: E tmerrshme që ministria nuki blen librat

Foto: LAPSH

Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, thotë se është e tmerrshme hedhja e përgjegjësisë nga Ministria e Arsimit te prindërit për blerje të teksteve të nxënësve.

“Të gjitha këto lojëra nuk janë të mira në arsim dhe mendoj që tekstet duhet të jenë të ndara, ky tekst për këtë lëndë, ai për atë lëndë, do të duhej të kontraktoheshin qysh në qershor dhe në fillim të gushtit t’i kishim pasur tekstet për t’i shpërndarë, ngase Qeveria nuk duhet të kursejë për arsim, sepse shpenzimet në arsim nuk janë shpenzime, por janë investime për të ardhmen. Ministria në ditët e fundit, për shkak të mospunës, mosangazhimit me kohë për problemet që i kanë brenda, dolën me një lajm të keq se tani as nuk do të shpërndajnë tekste … dhe ua la shtëpive botuese t’i dërgojnë tekstet nëpër librari, e pastaj prindërit t’i blejnë librat, me premtimin se gjoja do të rimburësohen”, është shprehur Jasharaj, për Kohavision.

Ai thotë se për një nxënës vetëm librat do të kushtojnë rreth 70 euro.

“Çfarë do të kemi në fillimin e vitit shkollor, do të kemi nxënës në klasa pa tekste shkollore dhe çka është më keq, një pjesë e prindërve ndoshta do të kenë mundësi t’i blejnë tekstet, e fëmijët e tjerë do të rrinë kokulur sepse prindërit e tyre nuk kanë pasur mundësi t’ua blejnë”, ka theksuar Jasharaj, përcjell albinfo.ch.

Jasharaj ka paralajmëruar se çmimet e librave nëpër librari mund të jenë edhe më të larta sesa që do të mund t’i blinte ministria me shumicë.