JD Vance arrin në Grenlandë

Foto: https://www.whitehouse.gov/

JD Vance, zëvendëspresidenti i SHBA-së, vizitoi Grenlandën në një udhëtim të diskutueshëm, duke akuzuar Danimarkën për mungesë sigurie në ishullin Arktik. Vizita e tij ka shkaktuar tensione diplomatike me Kopenhagenin, ndërsa presidenti Donald Trump ka shprehur synimin për të sjellë territorin nën kontrollin e Uashingtonit, shkruan DW.

Gjatë vizitës në një bazë ushtarake amerikane, Vance kritikoi autoritetet daneze për mungesë investimesh në sigurinë dhe mirëqenien e grenlandezëve. Ai argumentoi se SHBA mund të garantonte më mirë sigurinë e ishullit përballë interesave në rritje të Rusisë dhe Kinës në Arktik.

Udhëtimi u shkurtua pas protestave në Grenlandë dhe Danimarkë për mungesën e konsultimeve me autoritetet vendase. Ndërkohë, katër nga pesë partitë politike të Grenlandës formuan një qeveri të re koalicioni për të kundërshtuar synimet e Trump. Kryeministrja daneze Mette Frederiksen theksoi se Grenlanda i përket grenlandezëve, duke refuzuar idenë e aneksimit nga SHBA, percjell albinfo.ch.