Kapet rrjeti shqiptar me 90 kg marihuanë

Janë konfiskuar 90 kilogramë marihuanë, çmimi në treg i të cilës është rreth 1 milion euro dhe 300 gramë kokainë që kushtojnë 30 mijë euro

Policia e Oberhausenit ka goditur një rrjet tregtarësh shqiptarë me drogë. Është arrestuar njeri nga krerët e grupit dhe pesë të tjerë, të dyshuar si bashkëpunëtorë. Personi i dytë përgjegjës i rrjetit duket të jetë në Holandë, njofton policia. Me këtë rast janë konfiskuar 90 kilogramë marihuanë, çmimi në treg i të cilës është rreth 1 milion euro dhe 300 gramë kokainë që kushtojnë 30 mijë euro.

Hetimet për grupin shqiptar të drogës kanë filluar që nga gushti i vitit 2012, njofton policia. Rrjeti, të cilin e ka ndjekur komisioni hetues me emrin e shifruar “Tirana”  ka vepruar në Oberhausen, Duisburg dhe Mülheim. Në aksionin vendimtar për kapjen e tregtarëve me drogë, kanë marrë pjesë rreth 50 policë nga njësitet speciale.

Kapja e grupit është bërë pasi që policia kishte marrë informacione se të premten në Duisburg pritej arritja e një sasie të madhe droge. Zyrtarët policorë kanë ndjekur fshehurazi gjatë gjithë ditës tregtarët e drogës dhe në fund i kanë arrestuar ata. Veç sasisë së përmendur të marihuanës dhe kokainës, policia ka konfiskuar edhe dy automobila dhe para në vlerë prej 5000 eurosh.

Të arrestuarit, me moshë nga 23 deri në 45 vjeçare janë kryesisht me prejardhje nga Fieri ndërsa kanë rënë në sy vitin e kaluar duke shitur drogë në Oberhausen. “Ata kanë banuar në banesa konspirative bashkë me gra që merren me prostitucion, ku u shisnin kokainë klientëve të prostitutave”, thotë një zëdhënës i policisë.