Katari konfirmon lirimin e 39 të burgosurve palestinezë

Foto nga arkiva (KEYSTONE/AP Photo/Fatima Shbair)

Izraeli ka liruar 39 të burgosur palestinezë, si pjesë e marrëveshjes së pengjeve me grupin militant Hamas, tha Katari të premten mbrëma.

Zëdhënësi i Ministrisë së Jashtme të Katarit, Majid al-Ansari, konfirmoi “lirimin e 39 grave dhe fëmijëve të ndaluar në burgjet izraelite, duke mbajtur kështu zotimin e ditës së parë të marrëveshjes”.

Katari, së bashku me Egjiptin, ndihmuan në ndërmjetësimin e marrëveshjes dhe armëpushimit katërditor midis Izraelit dhe Hamasit, shkruan DW.

Komiteti Ndërkombëtar i Kryqit të Kuq ka konfirmuar transferimin e 24 pengjeve nga Gaza në Egjipt.

“Jemi të lehtësuar për këtë lirim dhe jemi duke i transportuar ata nga Gaza në kufirin Rafah, duke shënuar ndikimin në jetën reale të rolit tonë si një ndërmjetës neutral midis palëve”, tha organizata në mediat sociale.

Më herët, Kryqi i Kuq tha se po kryente një “operacion shumëditor” për të lehtësuar lirimin e pengjeve të mbajtura nga Hamasi nga Gaza dhe lirimin e të burgosurve palestinezë nga burgjet izraelite.

“Dhimbja e thellë që ndjejnë anëtarët e familjes të ndarë nga të dashurit e tyre është e papërshkrueshme”, tha Fabrizio Carboni, drejtori rajonal i Komitetit Ndërkombëtar të Kryqit të Kuq për Lindjen e Mesme, shkruan DW.

“Ne jemi të lehtësuar që disa do të ribashkohen pas një agonie të gjatë”.

Katari, i cili luajti një rol kyç në negociatat për lirimin e pengjeve të Hamasit, tha se 10 shtetas tajlandezë dhe një filipinas u liruan.

Kryeministri i Tajlandës, Srettha Thavisin, tha në një postim në rrjetet sociale se 12 punëtorë tajlandezë janë liruar, dy më shumë se shifra e dhënë nga Katari. Nuk u dha asnjë arsye për mospërputhjen, përcjell albinfo.ch.