Katërfishim i trupave të KFOR-it në Kosovë

NATO @NATO, X

Misioni paqëruajtës i NATO-s e ka katërfishuar praninë në veriun e Kosovës dhe përgjatë vijës kufitare.

Pothuajse 1 mijë ushtarë me armatim të rëndë janë dislokuar në veri, si rezultat i ngjarjeve të fundit në atë pjesë.

Kështu thuhet në një përgjigje për Klankosova.tv nga KFOR-i.

KFOR-i thekson se mban një qëndrim fleksibël dhe të shkathët në mbarë Kosovën dhe është i gatshëm t’u përgjigjet të gjithë skenarëve të mundshëm, në përputhje me mandatin e tij nga OKB-ja.

“Misioni ynë mbetet shërbimi i tretë i sigurisë në Kosovë, pas Policisë së Kosovës dhe EULEX-it, komandanti ynë është në kontakt të rregullt me të gjithë”, thuhet në përgjigjen e KFOR-it.

“KFOR-i është plotësisht i fokusuar në zbatimin e mandatit të OKB-së, bazuar në Rezolutën 1244 të Këshillit të Sigurimit të OKB-së për të ofruar një mjedis të sigurt për të gjitha komunitetet që jetojnë në Kosovë, në çdo kohë dhe në mënyrë të paanshme”, thuhet tutje në përgjigjen e misionit të NATO-s në Kosovë, përcjell albinfo.ch.

Më 24 shtator në Banjskë të Zveçanit, Serbia kreu agresion ndaj shtetit të Kosovës.

Si rezultat i sulmit terrorist nga një grup serb, i udhëhequr nga Milan Radoiçiq, u vra polici Afrim Bunjaku.

Kjo ngjarje bëri që vende si Britania, Rumania, Kroacia e Shqipëria të dërgojnë trupa shtesë.