Këshilli i BE-së miraton MSA-në me Kosovën

MSA parasheh themelimin e marrëdhënieve kontraktuale ndërmjet Kosovës dhe Bashkimin Evropian dhe paraqet hapin e parë formal drejt anëtarësimit të plotë në BE

Këshilli i Bashkimit Evropian miratoi sot Marrëveshjen e Stabilizim Asociimit ndërmjet Kosovës dhe Bashkimit Evropian, duke i hapur rrugë marrëveshjes përfundimtare me BE-në më 27 tetor në Strasburg. MSA, është marrëveshja më e rëndësishme deri më tani ndërmjet Kosovës dhe BE-së.

MSA parasheh themelimin e marrëdhënieve kontraktuale ndërmjet Kosovës dhe Bashkimin Evropian dhe paraqet hapin e parë formal drejt anëtarësimit të plotë në BE.

“Miratimi i sotëm i MSA-së nga Këshilli i BE është moment historik për Kosovën, dhe hap faqen e re drejt qëllimit përfundimtar të anëtarësimit të Kosovës në BE. Të gjitha institucionet kanë punuar jashtëzakonisht shumë për të ardhur në ditën e sotme”deklaroi Çollaku me rastin e miratimit të MSA-së.

Procesi negociator për MSA ka filluar në vitin 2013, ndërsa MSA përmban 597 faqe, në X tituj, VII anekse dhe 5 protokolle.

Ministria për Integrim Evropian ka bërë të gjitha përgatitjet ligjore për nënshkrimin e MSA-së dhe procedimin e mëtutjeshëm për ratifikim në Kuvendin e Republikës së Kosovës.

Presidentja e Kosovës, Atifete Jahjaga, ka mirëpritur vendimin e shteteve anëtare të Bashkimit Evropian për miratimin e Marrëveshjes së Stabilizim-Asociimit (MSA) ndërmjet Kosovës dhe BE-së. “Kemi rrugë të gjatë para vetes, por kjo rrugë tashmë është e qartë dhe e pakthyeshme”, ka thënë presidentja.