Këtë muaj mblidhen dy qeveritë

Kryeministri Edi Rama tha se brenda këtij muaji do mblidhen Qeveria e Shqipërisë dhe ajo e Kosovës, ndërsa pritet koordinim për themelimin e një fondi për Preshevën

Brenda këtij muaji, Qeveria e Shqipërisë dhe Qeveria e Kosovës pritet që të zhvillojnë mbledhjen e parë të përbashkët, e cila do të mbahet në qytetin e Prizrenit. Kjo mbledhja ishte paralajmëruar që në muajin shtator, pas një takimi të përbashkët ndërmjet dy kryeministrave, Hashim Thaçit dhe Edi Ramës.

Vetë kryeministri Rama deklaroi në konferencën për shtyp të fundvitit se dy qeveritë synojnë që të hartojnë një strategji të përbashkët qeverisjeje mes dy vendeve, për t’i bërë kufijtë shtetërorë të padukshëm, raporton “Shekulli”.

Po ashtu Rama konfirmoi se mbledhja e parë e qeverisë së Shqipërisë dhe asaj të Kosovës do të zhvillohet në janar 2014, ku pritet të akordohet edhe një fond për Luginën e Preshevës.

Në këtë mënyrë Qeveria Rama pritet të përmbush zotimin për t’u ardhur në ndihmë shqiptarëve që jetojnë në tri komunat shqiptare që administrohen nga Serbia, Preshevën, Bujanocin dhe Medvegjën.

Ndërsa kryeministri kosovar, Hashim Thaçi deklaroi në mbledhjen e fundit të qeverisë kosovare për vitin 2013 se mbledhja e përbashkët do të zhvillohet javën e dytë të janarit. Me këtë mbledhje do të nisë edhe koordinimi i dy qeverive për të investuar në projekte të përbashkëta kombëtare.