KFOR-i mbyll kufijtë e gjelbër Kosovë-Serbi

KFOR-i ka vendosur të mbyllë “kufijtë e gjelbër” në mes të Kosovës dhe Serbisë. Një urdhër i dhënë për këtë veprim nga komanda e NATO-s në Napoli, është konfirmuar sot edhe nga trupat në Prishtinë.

Fjala është në radhë të parë për rrugët alternative rreth vendkalimeve Bërnjak dhe Jarinje në veriun e Kosovës. Mirëpo nuk është caktuar ndonjë afat për bllokimin e këtyre rrugëve alternative, përmes të cilave serbët anashkalojnë dy vendkalimet e përmendura zyrtare kufitare.

Serbët e veriut të Kosovës kanë kundërshtuar mbylljen dhe kanë paralajmüeruar protesta dhe vendosje barrikadash, njofton agjencia zviceranbe sda duke iu referuar medieve serbe. 

Ndërkaq, mediet kosovare raportojnë se problemet kufitare me Serbinë, mosdefinimi i vijës kufitare ndërshtetërore do të jetë pengesa kryesore për përcaktimin e vendit të arrestimit të dy policëve të Kosovës.

“Për këtë, KFOR-i ka marrë përsipër që të përcaktojë vijën kufitare, duke mos sqaruar se a është ky proces i demarkacionit”, ka konfirmuar për  KTV-së zëdhënësi i KFOR-it, Dan Harvey.