KFOR-i mirëpret reduktimin e policisë në veri

Keystone EPA/GEORGI LICOVSKI

Përmes një komunikate për media, misioni euroatlantik i NATO-s në Kosovë, KFOR ka thënë se mirëpret vendimin e institucioneve në Kosovë për të reduktuar praninë e Policisë së Kosovës rreth ndërtesave komunale në veri të Kosovës.

“Në këtë drejtim, KFOR-i pajtohet se ka pasur një përmirësim të situatës së sigurisë në zonë, por është e rëndësishme të sqarohet se pikëpamja jonë nuk është rezultat i një aktiviteti të përbashkët vlerësues. Një vlerësim i përbashkët, në fakt, është një procedurë e ndryshme që kërkon veprime specifike, disponueshmëri të të dhënave dhe vlerësime sistematike në të cilat roli i KFOR-it, siç është rënë dakord ndërmjet NATO-s dhe BE-së, duhet të konsiderohet vetëm si i përshtatshëm dhe t’i nënshtrohet miratimit të komandantit të KFOR-it”, thuhet në njoftim, përcjell albinfo.ch.

Tutje thuhet se KFOR e mbështet plotësisht dialogun e ndërmjetësuar nga BE-ja dhe mbetet në kontakt dhe koordinim të ngushtë me të gjithë bashkëbiseduesit vendorë dhe ndërkombëtarë.