Pesë kisha dhe organizata të krishtera në Zvicër kanë miratuar dhjetë parime etike për përdorimin e inteligjencës artificiale (IA), duke theksuar se përparimi teknologjik duhet t’i shërbejë mirëqenies njerëzore dhe të mirës së përbashkët.
Nën titullin “Njerëzimi në epokën digjitale”, udhëzimet synojnë të orientojnë institucionet fetare dhe organizatat në përballjen me sfidat që sjell IA-ja, duke vënë theksin te transparenca, verifikimi i informacionit dhe përfshirja e të gjithë njerëzve në përfitimet nga zhvillimi teknologjik.
Nismës i janë bashkuar Kisha Ungjillore e Reformuar e Zvicrës, Konferenca e Ipeshkvijve të Zvicrës, Freikirchen.ch, Kisha Katolike e Vjetër e Zvicrës dhe Aleanca Ungjillore Zvicerane.
“Përparimi teknologjik është i mirë vetëm nëse u shërben të gjithëve”, deklaroi Frank Bangerter, ipeshkëv i Kishës Katolike të Vjetër të Zvicrës, duke theksuar nevojën për t’u kushtuar vëmendje të veçantë atyre që rrezikojnë të mbeten pas nga zhvillimet teknologjike.
Edhe Papa Leoni XIV ka bërë thirrje për vendosjen e rregullave të rrepta ndërkombëtare për përdorimin e inteligjencës artificiale, duke paralajmëruar për rreziqet e saj për bashkëjetesën njerëzore, por edhe duke vënë në pah mundësitë që ofron kjo teknologji.
