Kitara që i hapi rrugë refugjatit sirian në Belgjikë

Basil Khalil mbërriti në Belgjikë si refugjat që kishte ikur nga lufta në Siri në vitin 2012. Ai ka jetuar në Egjipt dhe Turqi, por kitara e tij ka bërë që ai të ketë më shumë shokë.

Ish-mësuesi i muzikës luajti me kitarë në rrugët e Stambollit dhe në kampet e imigrantëve në Serbi, ku u përpoq të ngazëllente personat rreth tij me këngët e tij, përcjell albinfo.ch.

Në Belgjikë ai mori statusin e refugjatit dhe ishte muzika që kapërceu barrierat gjuhësore dhe e ndihmoi atë të bënte miq si Jean Davidtsin, i cili e dëgjoi atë të luante në një kamp belg dhe e ftoi të qëndronte me të dhe gruan e tij për një vit.

Khalil tani jeton me familjen e tij në krahinën belge të Limburgut, ku ai filloi një punë në një kafene.

Bashkëshortja e tij, Entesar, po studion për biznes në qytetin Hasselt, ndërsa fëmijët e tij Taim dhe Rasel janë regjistruar në shkollën lokale. Përmes miqve të tij, Khalil u bashkua me një grup folklorik irlandez që takohet rregullisht për të performuar këngë.

Khalil po ashtu performon muzikë siriane dhe në vitin 2016 mori pjesë në një projekt të quajtur ‘Refugjatët për Refugjatë’, duke luajtur me kitarë me muzikantë nga pjesë të ndryshme të botës. Familja e tij ende ndodhet në Damask, përfshirë nënën dhe ai mban kontakte të rregullta me ta.