Komuna e Prishtinës, kifle për 20 mijë nxënës

Kryetari i Prishtinës, Shpend Ahmeti e realizoi edhe një premtim. Ai nga sot nisi shpërndarjen e shujtave për 20 mijë nxënës fillor në 43 shkollat e komunës së kryeqytetit

Komuna e Prishtinës filloi sot shpërndarjen e shujtave nëpër shkolla, duke ndarë fillimisht kifle për të gjithë nxënësit e kësaj komune. Kryetari i kryeqytetit, Shpend Ahmeti tha se shumë shpejt nxënësve do t’u shpërndahet edhe qumësht 0.25 mililitra, em sasi të konsiderueshme të kalciumit.

Ahmeti së bashku me drejtoreshën e Drejtorisë së Arsimit në Komunën e Prishtinës, Arbërie Nagavci, vizituan shkollën “Naim Frashëri” për t’u informuar nga afër lidhur me realizmin e këtij projekti.

“Jemi duke i shikuar mundësitë që ta zgjerojmë projektin e shujtave gjatë vitit të ardhshëm për të gjitha klasat. Sivjet së shpejti do të fillojmë edhe me shpërndarjen e qumështit, 250 ml, me kalcium të shtuar që është i domosdoshëm për rritjen e shëndetshme të fëmijëve”, deklaroi Ahmeti.

Sivjet, sipas tij, është përmirësuar cilësia e kifleve dhe është kërkuar që të jetë e ambalazhuara për arsye higjienike. “Kiflet do të jenë të mbyllura në mënyrë hermetike nga fabrika e cila i prodhon”, tha kryetari Shpend Ahmeti, sipas të cilit, përfitues të shujtave do të jenë edhe nxënësit e tri shkollave që janë përzgjedhur për mësimin tërëditor.

Projekti i shujtave mundësohet nga buxheti i kursyer i Komunës së Prishtinës nga shpenzimet e panevojshme, ndërsa fitues është shpallur OE “Premium Bakery”.  Çmimi i shujtës javore është  0.78 €.

Ndryshe, nga ky projekt i komunës së Prishtinës përfitojnë rreth 20 mijë nxënës në 43 shkolla fillore të Komunës, të klasave I – V. Kjo ide e kryetari të komunës ishte kundërshtuar nga këshilltarët e partive opozitare. Ata kanë thënë se shujtat nëpër klasa krijojnë papastërit.