Komuna zvicerane do të votojë për ndalimin e reklamave në rrugë

Banorët e Vernier, një komunë në Gjenevë, do të thonë fjalën e tyre për ndalimin e tabelave reklamuese.

Një referendum i nisur kundër një ligji të ri që ndalon këtë formë komunikimi ka mbledhur 2,300 nënshkrime, tha të hënën bashkëkryetari i komitetit të referendumit. Për këtë çështe janë kërkuar gjithsej 1,921 nënshkrime të vlefshme.

Muajin e kaluar këshilli administrativ vendor vendosi të ndalojë tabelat dhe format e tjera të reklamimit në rrugë, me argumentin se kjo përmirëson cilësinë e peizazhit, transmeton Albinfo.ch.

Megjithatë, komisioni i referendumit, i përbërë nga parti të së djathtës politike, beson se është një shkelje serioze e lirisë së tregtisë. Ndalimi i tabelave në Vernier pretendohet se do të dëmtonte seriozisht shumë biznese lokale, duke krijuar një situatë konkurrence të pandershme, përcjell Albinfo.ch.

Qytetarëve në qytetin e Gjenevës gjithashtu së shpejti do t’u kërkohet të votojnë për ndalimin e ngjashëm të reklamave në hapësirat publike. Një referendum i nisur nga e djathta politike kundër ligjit që zbaton nismën popullore komunale “Genève zéro pub, libérons nos rues de la publicité commerciale” (Gjenevë – zero reklama, le të çlirojmë rrugët tona nga reklamat komerciale) ka mbledhur nënshkrimet e nevojshme.