Komunat veriore nuk kanë buxhet për të shlyer borxhin e energjisë elektrike

@albinfo.ch

Katër komunat veriore të Kosovës janë të obliguara nga një vendim i Qeverisë së Kosovës që me kursimet e tyre të paguajnë borxhin e energjisë elektrike të shpenzuar nga qytetarët e pjesës veriore.

Konsumatorët nga veriu i detyrohen KOSTT-it edhe 18.9 milionë euro të tjera për pagesën e të cilave Qeveria është e detyruar të gjejë zgjidhje.

“Pjesa e papaguar mbetet 18.9 milionë euro që mbeten obligime, të cilat do të duhen prapë të mbulohen nga Qeveria e Kosovës që i takojnë një periudhe të vitit 2023… Mbetet të shihet prej Qeverisë mënyra se si do të mbulohet. Kërkesa është adresuar gjatë vitit 2023”, ka deklaruar kryeshefi i KOSTT-it, Evetar Zeqiri.

Në ditën kur Qeveria mori vendim për shlyerjen e borxhit të rrymës me buxhetin e komunave veriore, ministri i Financave, Hekuran Murati, pati thënë se do të përdoren edhe mjete e Fondit Zhvillimor të Mirëbesimit.

Fondi u krijua më 2013, bazuar në një marrëveshje Kosovë-Serbi dhe në të janë arkëtuar mjete nga taksat e mbledhura në pikëkalimiet kufitare Jarinjë e Bërnjak.

Ekonomistët kanë thënë se fondi nuk mund të shpenzohet përpos në fushat për të cilat është i destinuar, si në infrastrukturë, shërbime sociale, ngritjen e kapaciteteve institucionale, kulturë, sport dhe bujqësi.

“Është në kundërshtim me Ligjin për financat publike, është në kundërshtim me vetë destinimin e këtyre mjeteve. Nuk janë duke shkuar në zhvillim këto. Janë duke shkuar në konsum. Shpenzim i kotë. Harxhim i parave pa asnjë grimë racionalitet”, ka deklaruar ish-ministri i Financave, Haki Shatri.

Fondi ka një bord të përbërë nga përfaqësues të BE-së, Ministrisë së Financave e të komunitetit serb të komunave në veri.

Njohësi politik, Seb Bytyçi, ka thënë se për ndryshimin e destinimit të mjeteve duhet të ketë aprovim nga Brukseli.

“Nuk ka ndonjë ndalesë, për shembull, për pagesën e borxhit, por procedurat si funksionojnë janë që duhet të ketë pajtim mes përfaqësuesit të BE-së, për çfarëdo aprovimi të projekteve, sepse fondi udhëhiqet nga përfaqësuesi i BE-së dhe gjithashtu projektet propozohen nga katër komunat veriore”, ka deklaruar Bytyçi.

Në Qeveri nuk kanë dhënë shifra se sa është shuma e mjeteve të grumbulluara në fond./Koha.net