Konfiskohen 13 kilogramë drogë, 5 persona në pranga

Personave të dyshuar u janë konfiskuar më shumë se 13 kilogramë drogë, si dhe mjete financiare, në lek, dinarë e euro

Policia e Kosovës ka shtuar aksionet në kërkim të personave që kontrabandojnë substanca narkotike. Në këtë vazhdë sot në rajonin Lindjes, Policia e Kosovës arreston pesë persona të dyshuar për: blerje, posedim, shpërndarje dhe shitje e paautorizuar e narkotikëve, substancave psikotrope dhe analoge si dhe mbajtje në pronësi, kontroll ose posedim të paautorizuar të armëve”.

Sipas një njoftimi, Policia e Kosovës, konkretisht Drejtoria për Hetimin e Trafikimit me Narkotikë, gjatë një pune operative-hetimore, në fshatin Koretin të Gjilanit ka ndaluar një veturë dhe dy persona të dyshuar, ku gjatë kontrollit është gjetur një revole me 8 fishekë dhe një sasi e marihuanës.

“Me këtë rast të dyshuarit dyshohet se kanë kryer veprat penale ‘blerje, posedim, shpërndarje dhe shitje e paautorizuar e narkotikëve, substancave psikotrope dhe analoge  si dhe mbajtje në pronësi, kontroll ose posedim të paautorizuar të armëve”, thuhet në njoftimin e Policisë.

Njësiti antidrogë në Gjilan, në bashkëpunim edhe me trafikun rajonal dhe patrulla tjera policore kanë ndaluar edhe një veturë tjetër të përfshirë në këtë rast, me ç’rast në automjetin e tyre është gjetur një sasi e narkotikëve.

Sipas njoftimit, në pranga janë vënë pesë persona, prej tyre dy shtetas të Shqipërisë dhe tre kosovarë. Personave të dyshuar u janë konfiskuar më shumë se 13 kilogramë drogë, si dhe mjete financiare, në lek, dinarë e euro.