Kongresmeni amerikan: I alarmuar nga prania e forcave serbe në kufirin përgjatë Kosovës

Pas situatës së fundit në veri të vendit, ka reaguar edhe kongresmeni amerikan, Ritchie Torres duke thënë se është i alarmuar pas informacioneve se Serbia ka shtuar forca përgjatë kufirit me Kosovën, përcjell albinfo.ch.

“Si një përkrahës dhe aleat krenar dhe i palëkundur i Republikës së Kosovës, jam gjithnjë e më i alarmuar nga raportet për një dislokim të madh dhe të sofistikuar të forcave serbe përgjatë kufirit Serbi-Kosovë”, ka shkruar ai.

Me këtë rast, Torres ka shpërndarë një shkrim të “Reuters”, e ku zëdhënësi i Këshillit Kombëtar për Siguri të SHBA-së, John Kirby, në një konferencë për media dje ka ngritur shqetësimin e SHBA-së për një vendosje të madhe të trupave serbe afër kufirit me Republikën e Kosovës.

Kirby ka thënë se SHBA po e vëzhgon situatën dhe ka kërkuar nga Serbia që të tërheqë trupat e saj.

Kirby u pyet nëse ky grumbullim i trupave ushtarake pranë kufirit është sinjal se Serbia po përgatitet për ndonjë pushtim ushtarak, por ka thënë se qëllimin e një lëvizje të tillë të Serbisë s’mund ta thotë.