Konkurs ndërkombëtar për privatizimin e Banjës së Istogut

Pas tri dështimeve të privatizimit të Entit Medicinal për Terapi Fizikale dhe Rehabilitim në Banjë të Istogut është paralajmëruar hapja e tenderit të katërt. Por kësaj here thuhet se ky tenderim do të jetë me karakter ndërkombëtar.

Lajmin për një tenderim nuk e mohojnë as anëtarët e Bordit të kësaj organizate.

“Ne jemi të njoftuar zyrtarisht se procesi i privatizimit do të fillojë më 20 prill të këtij viti. Hapja e tenderit do të bëhet më 4 qershor 2012, data e ofertimit do të jetë më 20 korrik 2012. Sipas burimeve tona, për këtë gjë do të hapet një tender ndërkombëtar me “spin off” të rregullt e me kushte të veçanta”, ka theksuar njëri ndër anëtarët e Bordit Drejtues, njëherësh edhe kryetar i Sindikatës së Punëtorëve të kësaj organizate, Nimon Hetemaj.

Hetemaj ka deklaruar se një shitje e tillë është e mirëseardhur për punëtorët e kësaj ndërmarrjeje shoqërore, duke pasur parasysh se tri tenderimet e mëparshme kanë dështuar, ndërsa ndërmarrja është përballur me probleme të natyrave të ndryshme.

“Gjendja momentale, pas formimit të Bordit Drejtues prej 5 anëtarësh, është e mirë, dhe ka krijuar kushte të mira pune, por kjo organizatë meriton edhe kushte më të mira pune dhe paga shumë më të mira për punëtorët e saj”, ka thënë ai.

Sipas tij me privatizimin ndërkombëtar nuk do të këtë lëvizje në numrin e punëtorëve, ndërsa edhe kushtet dhe pagat do të jenë më të mira, shpreson ai.

“Shitja ndërkombëtarëve do t’ i favorizojë punëtorët tanë, por edhe do të krijojë kushte më të mira për pacientët”, është shprehur ai.

Hamdi Blakaj, ish-drejtor i kësaj ndërmarrjeje, thotë se aktualisht kushtet e punës janë përmirësuar dukshëm dhe përmirësimet vërehen kudo.

“Gjendja aktuale pas formimit të Bordit drejtues është e mirë. Tash janë shuar keqpërdorimet, ndërsa me privatizimin ndërkombëtar kushtet e punës do të jenë edhe më të mira, por edhe cilësia e punës besoj do të jetë edhe më e mirë, sepse edhe pagat do të jenë më të volitshme”, potencon ai, shkruan “Koha Ditore”.