Republika e Kosovës është pranuar të shtunën mbrëma, si anëtare vëzhguese në Organizatën Ndërkombëtare të Frankofonisë në samitin e Senegalit. Shtetet anëtare e pranuan Kosovën në samitin e frankofonëve, ku po merr pjesë edhe presidentja e Atifete Jahjaga dhe shefi i diplomacisë, Enver Hoxhaj.

Në samit morën pjesë një numër i madh i burrështetasve nga vende të ndryshme të botës, në mesin e të cilëve edhe presidenti i Francës, Fransua Hollande.

Në një fjalë rasti drejtuar pjesëmarrësve të samitit, presidentja Jahjaga tha se kjo është ditë e veçantë për Kosovën, sepse po anëtarësohet në një organizatë aq të rëndësishme me të cilën ndanë vlera të përbashkëta të komunikimit dhe bashkëpunimit.

“I jam mirënjohëse secilit shtet anëtar të OIF për mbështetjen që i keni ofruar Republikës së Kosovës dhe konsensusin tuaj të vendosur që ta pranoni Kosovën në mesin tuaj. Duke e përfshirë Kosovën në këtë organizatë, ju shtuat edhe një përkrahëse të vlerave që avancojnë paqen dhe një zë më tepër që fuqizon dialogun dhe partneritetin si mënyrën e vetme për të gjetur zgjidhje për sfidat e së ardhmes që prekin secilin prej nesh”, tha Jahjaga.

Si shteti më i ri në Evropë, Kosova sipas saj, është e përkushtuar të ndërtojë një vend të qytetarëve të barabartë, për të qenë vend anëtar i Bashkimit Evropian, i integruar në aleancën veriatlantike të NATO-s.

“Në këtë tryezë, Kosova dhe institucionet e saj do të sjellin kontributin tonë si pjesëtarë të barabartë për të përmirësuar jetën e qytetarëve tanë dhe për të ndërtuar ura bashkëpunimi politike, kulturore dhe ekonomike që do të avancojnë marrëdhëniet tona bilaterale dhe do të forcojnë vlerat tona të përbashkëta”, tha ajo.

Përveq Kosovës, në Organizatën Ndërkombëtare të Frankofonisë janë anëtarësuar edhe Kosta Rika dhe Meksika. OIF përbëhet nga 75 Shtete dhe Qeveri, nga të cilët 56 anëtare dhe 19 vëzhgues. Maqedonia ka statusin e anëtares së plotfuqishme që nga samiti i Bukureshtit në vitin 2006.

Ndryshe, për disa dekada gjuha frënge ka qenë gjuhë obligative në Kosovë. Ndërsa pas luftës, gjuha anglezë e ka zëvendësuar frëngjishten, edhe pse në shumë shkolla mbetet si gjuhë e dytë.