Kosova dhe Shqipëria, konsullatë të përbashkëta në Bari

Ofrimi i shërbimeve konsullore për qytetarët e Kosovës në Konsullatën e Përgjithshme të Republikës së Shqipërisë në Bari, sipas MPJ-së, bëhet për të mbështetur dhe asistuar kërkesat dhe nevojat e shtetasve të Kosovës në rajonet e Jugut të Italisë

Autoritetet e Kosovës dhe ato të Shqipërisë kanë arritur marrëveshje të përbashkët diplomatike, që konsullatën e Shqipërisë në Bari të Italisë ta shfrytëzojnë edhe qytetarët e Kosovës që jetojnë në këtë shtet. Marrëveshja është arritur ndërmjet dy ministrave, Enver Hoxhajt dhe Ditmir Bushati.

Sipas një njoftimi lëshuar nga Ministria e Punëve të Jashtme e Republikës së Kosovës, thuhet se marrëveshja për vazhdimin bashkëpunimit të frytshëm me Shqipërinë është arritur gjatë vizitës së ministrit të Punëve të Jashtme të Kosovës, Enver Hoxhaj, në Tiranë në kuadër të Konferencës së Ambasadorëve.

”Nën ombrellën që krijon marrëveshja e vendosur mes dy palëve për të bashkëpunuar dhe mbështetur njëra-tjetrën në shërbimin diplomatik dhe atë konsullor do të hedhin edhe një hap tjetër, duke përforcuar nivelin dhe stadin e marrëdhënies në përfaqësimin e përbashkët Kosovë – Shqipëri”, thuhet në komunikatë.

Ofrimi i shërbimeve konsullore për qytetarët e Kosovës në Konsullatën e Përgjithshme të Republikës së Shqipërisë në Bari, sipas MPJ-së, bëhet për të mbështetur dhe asistuar kërkesat dhe nevojat e shtetasve të Kosovës, “në rajonet e Jugut të Italisë, por edhe për të gjithë ata që zgjedhin Barin, si portin hyrës ose dalës, për udhëtimet, pushimet apo lëvizjet e tyre nëpërmjet Shqipërisë për në Kosovë”.

Kjo praktikë, sipas tyre, është vazhdimësi e bashkëpunimit që ka filluar më herët në Milano si dhe para disa javësh në Mynih.