Kosova e Zvicra tash mund të transferojnë të burgosurit

Secili kosovar i dënuar, që ka pasaportë të Republikë së Kosovës, edhe nëse jeton në Zvicër, mund të kërkojë që vuajtjen e burgut ta bëjë në Kosovë.

Kjo e drejtë atyre u takon nga e hëna, pasi u nënshkrua një marrëveshje e tillë bashkëpunimi ndërmjet Kosovës dhe Zvicrës.

Hajredin Kuçi, ministër i Drejtësisë së Kosovës, nënshkroi marrëveshjen në fushën e bashkëpunimit juridik ndërkombëtar për “Transferim të personave të dënuar”.

Ndërkohë, për palën zvicerane, marrëveshjen e nënshkroi Ambasadorja e këtij shteti në Kosovë, Krystyna Marty Lang.

Përveç kësaj, bazuar në këtë dokument, përveç shtetasve të Kosovës, një e drejtë e tillë u garantohet edhe shtetasve zviceran i dënuar në Kosovë, të cilët mund të kërkojë që burgun ta vuajnë në Zvicër.

Duke i çmuar lart marrëdhëniet ndërmjet Kosovës dhe Konfederatës zvicerane, Kuci tha se me këtë marrëveshje, forcohen edhe më tutje bashkëpunimi në fushën juridike ndërkombëtare.

“Qytetarët e Kosovës që kanë pasaportën e Kosovës, që kanë shtetësinë e Kosovës do të gëzojnë mbrojtjen e Republikës së Kosovës, kudo që gjinden në vendet e tjera”, tha ministri Kuci.

Ai në veçanti tha se shteti do të jetë i kujdesshëm që ata të mos ekstradohen në asnjë vend, e aq më pak në Serbi. “Të mos ekstradohen në Serbi, ku kryekëput aktakuzat e tyre janë me motive politike”, ka theksuar Kuçi.

Sipas tij, Republika e Kosovës ka kapacitete të plota, duke përmendur që brenda për të garantuar zbatimin e marrëveshjeve.

“Gjatë një viti kanë ndodhur vetëm dy raste të ikjes nga burgu, por që pas vetëm 24 orëve ata janë zënë”, nënvizoi kreu i kësaj ministrie.

E kënaqur me nënshkrimin e kësaj marrëveshje u shpreh edhe ambasadorja e Zvicrës në Republikën e Kosovës, Krystyna Marty Lang.

Ajo theksoi se kjo marrëveshje ka për qëllim rehabilitimin e të burgosurve dhe kryerjen e dënimit në vendin e tyre, duke përmendur se Zvicra dhe Kosova tashmë kanë një bashkëpunim të suksesshëm në fushën e ligjit.

“Marrëveshja që kemi nënshkruar ka qellim humanitar dhe shtyn përpara rehabilitimin social të të burgosurve dhe i mundëson personave që janë dënuar në një shtet të kryejnë dënimin ne vendin e tyre”, ka theksuar ambasadorja zvicerane.

Marty dhe rasti “Medicus”

Me këtë rast, zëvendëskryeministri, dhe njëherësh Ministri i drejtësisë, Hajredin Kuçi, ka bërë të ditur se ka nënshkruar kërkesën e EULEX-it, që Dick Marty të dëshmojë në rastin “Medicus”. “Kërkesën e EULEX-it ka kohë që e kam nënshkruar që ai të vijë dhe të dëshmojë në Kosovë”, ka theksuar ai, ndërkohë që ambasadorja e Zvicrës në Kosovë, Krystyna Marty Lang, tha se nuk është në dijeni nëse Dick Marty do të vijë për të dëshmuar në Kosovë ose jo. “Nuk e di, nuk kam informacione nëse ai do të vijë të dëshmojë në Kosovë ose jo. Por, për këtë duhet të pritet vendimi i Këshillit të Evropës, sepse Dick Marty është anëtar i këshillit”, ka theksuar ajo.