Kosova fillon dialogun për liberalizimin e vizave

Komisionerja e BE-së, Malmstrom, ka thënë se Kosova i ka plotësuar të gjitha kushtet për nisur dialogun për liberalizimin e vizave

Kryeministri Hashim Thaçi dhe komisionerja e Bashkimit Evropian për Çështje të Brendshme Cecilia Malmström, kanë konfirmuar fillimi i dialogut për liberalizimin e vizave, megjithëse nuk është dhënë ndonjë datë se kur do të jepet Udhërrëfyesi për liberalizimin e vizave.

Komisionerja e BE-së, Malmstrom, ka thënë se Kosova i ka plotësuar të gjitha kushtet për nisur dialogun për liberalizimin e vizave. Duke mos dhënë datë se kur do të jepet udhërrëfyesi, ajo ka theksuar se duhet plotësuar edhe disa kritere të BE-së.

“Ajo që sot po bëjmë është të jemi këtu dhe të konfirmojmë se kushtet për nisjen e dialogut janë përmbushur”, ka thënë Malmstrom. Ajo ka potencuar sidomos çështjen e riatdhesimit dhe ri-integrimit të personave të kthyer nga vendet e BE-së për në Kosovë.

Sipas saj, nisja e dialogut nënkupton vendim politik, kurse kushtet tjera ndërlidhen me çështje teknike dhe të legjislacionit.

Me këtë rast, kreu i ekzekutivit të Kosovës, Hashim Thaçi, ka theksuar se Kosova është në rrugë të sigurt drejt Bashkimit Evropian.